ڪيناڙي، ڪينو، ٽوٻڻي

60 سينٽي ميٽر جسامت واري هن ڪيناءَ جا نر ماد به هڪجهڙا ٿين ٿا. مختلف مندن ۽ عمر جي مختلف حصن ۾ رنگ پيو بدلبو اٿس. اونھاري ۽ بھار ۾ رنگ اڇو ھوندو اٿس. اڇو مٿو، پُٺي ۽ پَـر سرمائي ۽ پرن جو مٿيون ڀاڱو روپلو، پرن جون پڇڙيون ڪاريون اٿس ، جنهن جي ڇيڙن تي اڇا گول چٽ ۽ نشان ٿين ٿا. چهنب پيلي هوندي اٿس جنهن جي هيٺئين پاسي ڳاڙهو ٽڪو ٿئيس ٿو. ٽنگن جو رنگ پيلو گلابي هوندو آهيس. چهنب کي ڪاري يا ناسي نوڪ ٿيندي اٿس. سياري ۾ ڪنڌ تي ناسي چٽا ۽ لينگها ڏسبا آهن. نابالغ پکيءَ جي پٺي گهري ناسي ۽ هيٺيون جسم هلڪو ناسي ٿئي ٿو جنهن تي ڌڳڙ ڌڳڙ ۽ لينگها هوندا آهن.