ابڙو اڪيڊمي Abro Academy
2020-07-18
داخلا نمبر 532
عنوان ڪٻر
شاخ پکي
پڙهيو ويو 406
داخلا جو حوالو:
ڪٻر
23 سينٽي ميٽر (9 انچ) جسامت واري ھن پکيءَ جا نر ماد ھڪجھڙا ٿين ٿا. گھڻو ڪري گاھير ۽ ھيٺانھن علائقن ۾ رھي ٿو. رنگ جو چمڪدار ناسي آھي. مُنڍي ، پُڇ ۽ پرن جا پاسڙا ڪارسرا گــھرا ناسي ھوندا اٿس. پَر جي وچ تي اڇو ٽِڪو ٿئيس ٿو جيڪو اڏامڻ مھل صاف نظر ايندو آھي. چنھب ھيڊي ۽ اک جي پويان سھڻو ھيڊو نشان ھوندو اٿس. ٽنگون ۽ پير به ھيڊا ھوندا اٿس. پير ۽ چنبا پنڌ لاءِ مضبوط ٿين ٿا ۽ پُڇ ڪي قدر ننڍو ھوندو اٿس.
ڪٻر مقامي پکي آھي ۽ لڏ پلاڻ ڪونه ڪندو آھي. ان پاڻ ۾ انساني آبادين جي ويجھو رھڻ جي ھمت پيدا ڪئي آھي ۽ عام طور بيخوف آھي. ميوا، ٻج، جيت، ڪينئان ۽ گھريلو اوبر کائي ويندو آھي. ھي پکي صبح جو سوير وڻ تي ھڪ ھنڌ ولر ڪري جمع ٿيندا آھن ۽ زور زور سان ٽِيڪو ڪندا آھن. لڳ جي مند ۾ نَر پکي خاص انداز ۾ سر جھڪائي ۽ پيشانيءَ تي کنڀ کڻي مادين کي ريجھائيندا آھن.
ڪٻر وڻ جي پور ۾ يا عمارتن ۾ سادو پيالي نما آکيرو ٺاھي ٿي، جيڪو گاھه، پاڙن ۽ تيلين جو ھوندو آھي. ڪٻر ڏکڻ ايشيا ، افغانستان ، ٿائيلينڊ ۽ ملائيشيا وغيره ۾ ٿئي ٿي. هي ماحول : 6 جو پکي آهي.