ابڙو اڪيڊمي Abro Academy
2020-07-18
داخلا نمبر 521
عنوان ڀونتريو
شاخ پکي
پڙهيو ويو 398
داخلا جو حوالو:
ڀونتريو
ڀونتريو
ڀونتريو
18سينٽي ميٽر (7 انچ) جسامت جو هي پکي پڻ تتر ۽ ڪُڪڙ جي ڪٽنب (Phasianidae) ۾ شامل آهي. ان جي نَر ۽ ماديءَ جي کنڀن جي رنگ ۾ فرق هوندو آهي. نَر جي مـُنڍي ۽ ڳڄيءَ تي جهرڪ وانگر اڇيون ڪاريون پٽيون ننڍڙن ڳانن وانگر نمايان هونديون آهن. ماديءَ جا کنڀ به ترتيب ۾ ته اهڙا ئي آهن پر ان جون ليڪون گهٽ نمايان هونديون آهن. ماديءَ جي سيني وارن کنڀن تي ڪارن ٽٻڪن جو هڪ سلسلو ٿئي ٿو جڏهن ته نر جي ڇاتي ڪجهه گـهري ڀوري هوندي آهي. جسامت ۾ ٻئي برابر ٿين ٿا. هيءَ ننڍڙو پکي به حلال آهي ۽ شڪار ڪري کاڌو ويندو آهي. ان جي ٻولي ٽِن هلڪن سُرن تي مشتمل ٿئي ٿي.، جيڪا رات توڻي ڏينهن جو پئي ٻڌبي آهي.
ڀونتريو خشڪ گاهه ۽ وڌندڙ فصلن ۾ لڪندو آهي. خوف مهل اڏامڻ بدران ڊوڙون پائي ڀڄڻ کي ترجيح ڏيندو آهي. ان سان گڏ هيٺاهيون اڏارون ۽ گهتون به هڻندو ويندو آهي. هي ڊگهن فاصلن وارو لاڏوڻي پکي آهي ۽ سُٺي اڏار جي صلاحيت اٿس. سنڌ ۾ سياري ۾ ولرن ۾ ڏسبو آهي.
ڀونتريو زمين تي چڳندو آهي. ٻِج، گؤنچ، مکڙيون، سلا ۽ پن کائيندو آهي. ان جو آکيرو ڍڪيل ماحول ۾ زمين تي پيرن سان کرڙيون هڻي کوٽيل هڪ ننڍڙي کڏ هوندو آهي، جنهن کي جسم جي زور سان شڪل ڏيندا آهن ۽ ان ۾ ڪچڙو سنهڙو گاهه رکندا ويندا آهن. ڀونتريي جو آنو ننڍو ۽ ذري گهٽ گول ٿئي ٿو، جنهن تي ڪارا چٽ هوندا آهن. اهي چٽ ان آني کي ماحول ۾ ڪيموفلاج مهيا ڪندا آهن. ڀونتريو يورپ کان سائيبيريا ۽ منگوليا ۾ افزائش نسل ڪندو آهي ۽ ايران، پاڪستان، هندستان ۽ افريڪا ۾ سيارو گذاريندو آهي.