ابڙو اڪيڊمي Abro Academy
2020-07-22
داخلا نمبر 643
عنوان پيهوڙِي
شاخ پکي
پڙهيو ويو 397
داخلا جو حوالو:
پيهوڙِي
55 سينٽي ميٽر (22 انچ) جسامت جي هن آبي پکيءَ جا نر ماد ٿوري فرق سان هڪجهڙا ٿين ٿا. ان جو جسم ڪارڙو ۽ پَر اڇا ٿين ٿا جنهن جون چوٽيون ڪاريون هونديون آهن. منهن ۽ ڳچي به اڇي، ڪنڌ تي سونهري کنڀ ۽ لڳ جي مند ۾ نر توڙي ماديءَ جو پڇ ڊگهو ۽ اڌ گول جي شڪل ۾ سنهڙو ٿئي ٿو. ان جي پير جون آڱريون ۽ چنبا ڊگها ٿين ٿا. جن جي مدد سان اهو ڍنڍن ۾ آبي ٻوٽن جي ترندڙ پنن تي پنهنجو وزن ورهائي پنڌ ڪري سگهندو آهي. هي پکي مڇي، ڏيڏر ۽ غير ڪرنگھيدار جانور کائي ٿو. مادي پيهوڙي هڪ ئي وقت ڏهاڪو کن نـَرن سان تعلق رکي ٿي. انهن مان هر هڪ نَر پنھنجي ڀاڱي وارن آنن تي پاڻ ئي آرو ڪندو آھي.
پيهوڙيءَ جو آکيرو ترندڙ پنن تي رکيل خشڪ ڪک ۽ ٻين ٻوٽن جي هڪ سنهي تهه تي مشتمل ٿئي ٿو. مادي نَر کان ٿوري وڏي هوندي آهي ۽ رنگ ساڳيا پر ڪجهه شوخ هوندا اٿس. هي نسل سڄي ڏکڻ ايشيا ۽ ڏور اوڀر ۾ ٿئي ٿو.