ابڙو اڪيڊمي Abro Academy
2020-07-22
داخلا نمبر 628
عنوان ڏوئيِرو
شاخ پکي
پڙهيو ويو 412
داخلا جو حوالو:
ڏوئيِرو
ڏوئيِرو
90 سينٽي ميٽر جسامت جي هن پکيءَ جا نر ماد هڪجهڙا ٿين ٿا ۽ بنيادي طرح لاڏوڻي آهي. ٻگهه جهڙي بيهڪ اٿس. سڄو جسم اڇو، چهنب ۽ ٽنگون ڊگهيون ۽ ڪاريون ٿينديون اٿس. چپتري ۽ ڊگهي چهنب جي نوڪ چمچي جهڙي هئڻ ڪري اهو نالو مليو اٿس. ڳچيءَ وٽ اگهاڙي کل ۽ ڪنڌ کان لڙڪيل چوٽي ٿئيس ٿي. تانگهو پاڻي هوريان هوريان جهاڳيندو آهي. اڪثر ساحلي ڪنڌين، ڍنڍن، ڌٻڻين ۽ سيلابي پاڻين تي ننڍين ٽولين سان ڏسبو آهي. ڏوئيرو پنهنجي چهنب ٿوري کليل رکندو آهي ۽ شڪار کي ان ۾ پڪڙي وٺندو آهي. سندس شڪار ۾ مڇيون، ننڍڙا آبي جانور ۽ جيت شامل آهن. هوريان اڏامندو آهي. ان مھل ڳچي ۽ پير اڳتي ۽ پوئتي پکڙيل هوندا اٿس. ان جو آکيرو ڪنهن وڻ تي تيلن، ڪاٺڙين ۽ گاهه جي وڏي ڍڳ تي مشتمل هوندو آهي. ذري گهٽ سڄي يوريشيا ۾ ملي ٿو. ھي ماحول : 7 جو پکي آھي.