ابڙو اڪيڊمي Abro Academy
2020-07-08
داخلا نمبر 480
عنوان شِڪرو
شاخ پکي
پڙهيو ويو 485
داخلا جو حوالو:
شِڪرو Indian Sparrow-hawk / Accipiter Badius /
شِڪرو
33 سينٽي ميٽر جسامت واري ھن پکيءَ جي نر جو رنگ نيرانجهڙو سرمائي ٿئي ٿو، ڳچي ۽ کاڏي اڇي رنگ جي ۽ ڇاتي ۽ پيٽ جو رنگ اڇو آهيس، جنهن تي ناسي رنگ جون تتر کرڙي ليڪون هونديون آهن. اکيون ناسي اٿس، ماديءَ جو قد نر کان وڏو ٿئي ٿو، ان جي پُٺي سِرڻ وانگر گهري ناسي، ڇاتي ۽ پيٽ تتر کرڙي ناسي ۽ اڇو ٿئي ٿو. پڇ تي ٽي چار يا پنج افقي صورت ۾ ناسي پٽا هوندا اٿس. اکيون ۽ پير هيڊا ٿين ٿا.
شِڪري جي ڊيگهه 33 سينٽي ميٽر ٿئي ٿي ۽ اهو ننڍڙي بازن ۾ سڀ کان عام آهي. اهو اڪثر وڻڪار وارن علائقن ۾ وڻن تي ڏسبو آهي. ان جي اڏار خاص قسم جي آهي، ٻه ٽي ڀيرا پَر ڦڙڪائي مختصر هيٺين اڏام اڏندو وڻن ۽ گاهه وچان تيزيءَ سان گهتون هڻندو، ڪو نه ڪو پکي ڦاسائي لامارو هڻي، اوچتو ڪنهن وڻ تي مٿي اڏامندو ويندو آهي. اڪثر ننڍڙن پکين جو شڪار ڪندو آهي. وڻن تي آڱر جيترين سنهڙين ڪاٺين جو آکيرو ٺاهي ٿو پر اهو ڪو مضبوط آکيرو ڪونه چئبو. اهو آکيرو وچ مان خالي ٿئي ٿو. شِڪرو سڄي يورپ، ايشيا ۽ آفريقا جي اترواري علائقي ۾ پکڙيل آهي. شِڪرو ماحول : 3 ۾ رھندو آھي.