الطاف حسين قومپرستن کي فوج سان ويڙهائڻ چاهي ٿو؟

�دس تہ محترم ڇا توهان عوام جي ڪا مدد ڪندؤ يا رڳو روايتي (سياسي نوعيت) جا بيان ڏيندؤ؟ عوام توهان لاءِ ڇا ڪري؟ عوام جيتريون قربانيون ڏنيون آهن، کين موٽ ۾ ڪفن کانسواءِ ڇا مليو آهي؟ عوام جي لاشن سان قبرستان ڀرجي چڪا آهن پر روپوش دهشتگرد هٿ نہ ٿا اچن، جيڪي دهشتگرد گرفتار آهن، انھن جو فيصلو ڪو نہ ٿو ٿئي ڇو؟ تازو وري لاش ميڙيا ويا، دهشتگرد طور هڪڙو پٺاڻ يا افغاني همراھہ جهليو ويو آهي، سهراب ڳوٺ ۽ سٽي ڪورٽ وٽ بم جي ڌماڪن ۾ مرندڙ يا زخمي ٿيندڙ اڪثر افغاني يا پٺاڻ هئا. قدرت پنھنجو حساب ڪري ٿي، ڇا اسان کي خبر نہ آهي تہ پاڪستان ۾ بندوق جو ڪلچر ڪنھن آندو؟ اسان کي اهو بہ احساس آهي تہ جنھن ماڻهوءَ بندوق کنئي، ان جو سر بہ بندوق کڻندي، الله پيو خير ڪري! سڀ ڌاڙيوال، دهشتگرد، سپاهي ۽ جوان نہ رڳو ٻين کي بندوق جي نوڪ تي بيھارين ٿا پر پاڻ بہ بندوق جي نوڪ تي بيٺل اهن.

هن مضمون ۾ آئون بم ڌماڪن ۾ ”را“ جي ملوث هجڻ، ڪشمير، وغيره بحث ۾ وڃڻ ڪو نہ ٿو گهران پر جڏهن امن امان جي خرابي ۽ ايم ڪيو ايم وٽان هٿياربند جدوجهد جي ڌمڪي ملي آهي تڏهن سنڌ جي گورنر جناب دائود پوٽي جو حقيقت تي ٻڌل موقف بہ تنقيد هيٺ اچي ٿو وڃي، گورنر صاحب چيو تہ ”ڌماڪن سان حڪومت کي ڪمزور نٿو ڪري سگهجي!“ آئون پڇان ٿو تہ جناب! ڇا حڪومت لوھہ جي ٺھيل آهي؟ تڏهن حڪومتون پنھنجي هجڻ جو جواز وڃائي ويھنديون آهن. گورنر صاحب اهو بہ ٻڌايو تہ ”بم ڌماڪا روڪڻ انتظاميا جي ذميواري نہ آهي.“ واقعن ۾ ”را“ ملوث آهي! جناب ”را“ ملوث هوندي يا نہ هوندي اها جاچ تہ حڪومت ئي لهي سگهي ٿي. باقي بم ڌماڪا روڪڻ جيڪڏهن انتظاميا جي ذميواري نہ آهي تہ پوءِ ڪنھن جي آهي؟ ممڪن آهي تہ گورنر صاحب جي ڳالھہ اخبار ۾ مڪمل طور ڇپجڻ کان رهجي وئي هجي ۽ گورنر صاحب ايئن چيو هجي تہ ”انتظاميا اڪيلي سر منھن ڏيئي نہ ٿي سگهي، عوام بہ تعاون ڪري!“ جيڪڏهن ايئن آهي تہ پوءِ تڪرار ختم! البت آئون اهو ورجائي چوندس تہ ذميوار وري بہ حڪومت آهي. بم، ڀلي تہ ڪا بہ دهشتگرد تنظيم ڦاڙي، ذميوار وري بہ انتظاميا آهي، قوم پڇاڻو ايم ڪيو ايم يا ”النواز“ (جيڪا اڃا تائين هڪ اسرار آهي) کان ڪو نہ ڪندي، سوال وري بہ انتظاميا کان پڇيو ويندو. ڇا توهان وري بہ ايئن چوندا تہ انتظاميا ڪجھہ بہ نٿي ڪري سگهي! جناب ايئن تہ توهان پنھنجي هجڻ جو جواز وڃائي ويھندا. آئون هڪ ڀيرو وري عرض ڪندس تہ ايم ڪيو ايم پاران ”هٿياربند جهدوجهد“ واري ڌمڪي جيڪا الطاف حسين ڏني آهي. ان جو نوٽيس ٺيڪ طرح ورتو وڃي. نہ رڳو سرڪار پر قومپرست ڌرين کي بہ گذارش آهي تہ ايم ڪيو ايم جي وڇايل شطرنج جي چال کي سمجهن. ايم ڪيو ايم وارا پاڪستان ۾ وڌيڪ صوبن ۽ سنڌ جي ورهاست واري سوال تان هٿ نہ ٿا کڻن. مسٽر ممتاز ڀٽي کين سهڻو جواب ڏنو آهي تہ ايم ڪيو ايم وارا پاڻ لفظ ”مھاجر“ تان هٿ کڻي وڃن ۽ ان اجائي سڃاڻپ کي دفن ڪن، پاڻ کي سنڌي سمجهن ۽ سنڌي سڏائين.... هو اڄ 53 سال گذي وڃڻ کانپوءِ بہ مھاجر سڏائين ٿا تہ آخر ڪھڙي جواز هيٺ! جو ان وچ ۾ ٻہ نسل جوان ٿي ويا آهن. ڪاش 1973ع واري آئين تي ٺيڪ طرح عمل ٿئي ها، هاڻي تہ هن دستاويز کي ڦيرائڻ ۾ جيترو ڏوھہ سياسي حڪومتن تي آهي، فوجي حڪومت کي بہ انھن کان گهٽ ذميوار قرار ڏئي نٿو سگهجي.