ڳورپَٽ

ڳورپَٽ Honey Bedger (Ratel) - Mellivora capensis-

ڳورپَٽ

بنيادي طور تي افريقي ايشيائي نسل جو هي جانور 2 کان 3 فٽ ڊگهو ٿيندو آهي. پڇ وڌ ۾ وڌ 8 کان 12 انچ هوندو اٿس، چرا گاهن، صحرا، ٻيلن ۽ جبلن ۾ رهندو آهي. خوراڪ ۾ ماڪوڙا، ڪوئا، پکي، ڪِرڙيون ۽ ماکي شامل اٿس. ماکي ۽ ماکيءَ جي مکين جي لاروا جو تمام شوقين آهي. ڏرڙن ۾، وڻن جي پاڙن ۽ لوگهن ۾ رهندو آهي ۽ وڻن تي به چڙهي ويندو آهي، رات جو نڪرندو آهي.

مادي پنج ڇھه مهينا پيٽ ڪندي آهي ۽ هڪ کان چار ٻچا ڄڻيندي آهي. ڳورپٽ بي ڊپو جانور آهي ۽ بهادريءَ سان وڙهندو آهي. جڏهن ڪو جانور ان تي حملو ڪندو آهي ته ويڙهه دوران ڪني ڌپ ڇڏيندو آهي. ان جي کل جسم تي ڍرڙي ۽ مضبوط ٿئي ٿي، ان ڪري ان کي ڌڪ ۽ زخم کان بچاءُ رهي ٿو.

سرمائي سليٽي بجدار پٺيءَ واري هن جانور جو رنگ منهن کان سڄو پيٽ، ٽنگون ۽ پڇ جو هيٺيون حصو ڪارو ٿيندو آهي، چنبا تمام مضبوط هوندا اٿس، خاص ڪري اڳيان، جن جي مدد سان شڪار ۽ کوٽائيءَ جو ڪم ڪندو آهي. انهن ئي چنبن جي مدد سان اهو ڪڏهن ڪڏهن قبرون کوٽي سگھي ٿو، ان ڪري ان تي ’ڳور پَٽ‛ نالو پيو آهي. هونئن به ڳور پَٽ پنهنجو ٻِـر زمين ۾ هيٺ ڪافي اونهو ٺاهيندو آهي، اهو ڪڏهن ڪڏهن ايترو هيٺ هوندو آهي جو پاڻيءَ جي سطح تائين وڃي پهچندو آهي. ڳور پَٽ ماحول : 3 جو مماليه آھي.