ڳوراهه، پاڻيءَ واتڙيو، چِٽوڙ

پاڻيءَ واتڙيو، چِٽوڙ ڳوراهه، Painted Keelback /Xenochrophis cerasogaster /



زينوڪروفِس سيراسوگيسٽر جنس جي هن بلا جو جسم 0.6 ميٽر کان 1.0 ميٽر تائين ٿئي ٿو. ان جو پڇ 150 کان 200 ملي ميٽر هوندو آهي. مٿو ڊگهو ۽ سوڙهو ٿئيس ٿو.

هيءَ بلا نمايان طور رنگين ٿئي ٿي. ان ۾ ڳاڙهاڻ نمايان هوندي آهي. ان ۾ ڳاڙهي ۽ ڪاري رنگ جو عجيب ميلاپ ٿئي ٿو. جسم جو عام رنگ گهرو ڀورو يا نارنگي ٿئي ٿو. ٻنهي پاسي هڪ هلڪي پيلي ليڪ کان سواءِ هڪ ٻي نمايان ليڪ ونٽرلز کي ڇهندي پوئتي تائين وڃي ٿي. اها ليڪ جسم جي اڳئين حصي ۾ ڳاڙهي ٿي وڃي ٿي. پيٽ جي اڳئين حصي ۾ مٽيائين رنگ ۾ نمايان ڳاڙهو داغ ٿئي ٿو، جڏهن ته پويون حصو واڱڻائي ڳاڙهو ٿئي ٿو. ان جو پڇ هيٺان کان ڪارو يا مِٽيائون ٿئي ٿو، مٿو هيٺئين پاسي کان اڇو هوندو آهي، جنهن تي نمايان ڳاڙها نشان هوندا آهن.

هيءَ بلا بيٺل پاڻيءَ ۾، ان هنڌ گهڻي تعداد ۾ هوندي آهي جتي مختلف قسم جا آبي ٻوٽا ٿين. تمام خائف ۽ خبردار آهي. پاڻيءَ جي ڀر پاسي گاهه ۾ ملندي آهي. خطرو محسوس ڪندي گـهري پاڻيءَ ۾ لهي ويندي آهي. مارچ اپريل ۾ 20 کان 30 آنا ڏيندي آهي جن مان مئي جُون ۾ ٻچا ڦُٽي پوندا آهن. پڪڙجڻ کان پوءِ يا ڪڏهن خوف ۾ چڪ به پائيندي آهي. عام طور بي ضرر آهي. ان جي خوراڪ ۾ ڏيڏر مڇيون ۽ ٻيا آبي جانور شامل آهن. درياهه، ڍنڍن ۽ تلائن ۾ ٿئي ٿي.