گُـُجـو

گُـُجـو: سنڌ جو قديم ترين ڪوٽ

ٺٽي ۽ گهاري جي وچ ۾ گُجو شهر آهي. ان جي ڀر ۾ قومي شاهراهه کان ڏکڻ طرف هڪ ننڍڙي ٽَڪريءَ تي اهي تصويري يا علامتي نشان موجود آهن، جن لاءِ چئي سگهجي ٿو ته اهي سنڌو تهذيب کان به آڳاٽا آهن. بدقسمتيءَ سان جيئن ته اڃا تائين موهن جي دڙي واريون علامتون ئي پڙهجي نه سگهيون آهن، تنهن ڪري اهو به نٿو چئي سگهجي ته هنن قديم علامتي نشانن جي معنيٰ ڇا آهي؟ ڇا اها ڪا لکت آهي ۽ اصل ۾ سنڌو ماٿريءَ جي ڪنهن قديم عقيدي جو علامتي اظهار آهي؟ هنن نشانن جي سڀ کان پهرين نشاندهي اين جي مجمدار ڪئي هئي. هونئن هي ماڳ پٿر جي پوئين دور ۽ آمري ثقافت سان تعلق رکي ٿو. هاڻي ڪن محققن خاص ڪري ڊاڪٽر اَسمه ابراهيم ۽ ڊاڪٽر ڪليم لاشاريءَ خيال ڏيکاريو آهي ته اهي ايترا آڳاٽا نشان نه آهن پر اهي يوناني ۽ ساساني دور جي ٻين نشانن سان ڀيٽي سگهجن ٿا.