گدڙ

گدڙ Golden Jackal / Canis aureus /



هي مماليه قد ۾ 23 کان 43 انچ ٿئي ٿو. پڇ

8 کان 12 انچ ڊگهو هوندو اٿس. شڪل صورت ۾ بگهڙ جهڙو پر ان کان ننڍو، طبعيت ۽ عادتن ۾ مختلف آهي. طاقتور نه هئڻ سبب بهادر به نه آهي. قدبت ۾ ڪتي جيترو ٿيندو. دنيا جي ڪافي حصن ۾ ان جو نسل پکڙيل آهي خاص ڪري يورپ، آفريڪا ۽ ايشيا ۾ اهڙين جاين تي، جتي ڪي ڳوٺ چراگاهن ۽ صحرائن کي ويجها هجن .

گدڙ جو رنگ روپ ڪجهه هن ريت آهي: پُٺي پٿريلي هيڊي بادامي ڀوري ۽ ڪارسري. اندريان پاسا هيڊاڻ مائل اڇا ۽ پڇ جي چوٽي ڪارڙ ي هوندي اٿس. سڄو ڏينهن انسانن ۽ ڪتن جي پهچ کان پري گهاٽن ٻوُڙن ۾ ستو پيو هوندو آهي ۽ رات جو ڪوئا، ڏيڏر، ڪرڙيون، پکي، نانگ، جيت، انساني آبادين ويجهو ڍونڍ ۽ ڪڏهن ميوا به کائي ويندو آهي. رات جو ڪيئي ڀيرا اونايون ڪندو آهي ۽ جواب ۾ ٻيا گدڙ به اونايون ڪندا آهن ايئن ڪرڻ جو بظاهر سبب اهو ٿو لڳي ته ائين هو پاڻ ۾ رابطو رکندا آهن.

لڳ جي مند ۾ گدڙ ٻِر يا ڏرڙ ۾ رهندو آهي ۽ گداڙي 63 ڏينهن پيٽ ڪري ٿي. هڪ وقت ۾ سراسري طرح چار پنج ٻچا ڄڻيندي آهي. گدڙ جي کَل مند ۽ علائقي موجب مختلف رنگن جي هوندي آهي پر عام طور سونهري هيڊي يا ناسي هيڊي هوندي آهي. گدڙ اڪثر جوڙيون ۽ حدون مقرر ڪري رهندا آهن ۽ گڏجي شڪار ڪندا آهن. جن علائقن ۾ خوراڪ سٺي هجي، اتي ويهه ويهه گدڙن کي هڪ ٽوليءَ ۾ ڏٺو ويو آهي. هي ماحول : 6 جو مماليه آهي.