ڪوٽيرو بُٺي

کديجي واري مستقل آبشار سبب کديجيءَ جي ڀَر پاسي ۾ ۽ مٿي ٽڪرين تي نھايت قديم آثارن جو ھڪ سلسلو آھي. آبشار جي مٿان کاٻي ڪنڌيءَ تي قدرتي ٽاڪرو اَجھا آھن، ۽ اڃا مٿي چوٽ تي سڀ کان اوچي ڪاري ٽڪريءَ کي ڪوٽ واري بُٺي يا ڪوٽيرو بُٺي چون ٿا. ان بُٺيءَ جي ڇت کي پٿرن جي ننڍڙي ديوار سان ڪوٽ ڏنو ويو آھي. ماڳ کي ڏنل ننڍڙو پٿريلو ڪوٽ ڪجھه اھڙو ئي آھي، جھڙو ٻاٻرو آثارن واري بُٺيءَ تي يا گاجي شاھه (بُنجو: مٿين سائٽ) تي آھي، اھا ديوار وچ وچ مان کُٽل ۽ ڊٺل ڊٺل آھي. ڪوٽيرو بُٺي سائٽ تان چقمقي پٿر جا بليڊ به ملن ٿا. ھنن آثارن جو ذڪر پاڪستان ٺھڻ کان اڳ انگريز آرڪيالاجسٽن ڪيو آھي ۽ ان کي تاريخ کان آڳاٽو قرار ڏنو آھي.
ھن وقت ھي علائقو ممنوع آھي ۽ ڪوبه محقق، آرڪيالاجسٽ، سياح يا عام ماڻھو اوڏانھن نٿو وڃي سگھي.