ڪـُڪري

ڪُڪُري Oligodon



سنڌ ۾ ڪڪري بلائن جا ٻه قسم ٿين ٿا. ان جنس جو مٿو ننڍو ۽ مٿين ڄاڙيءَ جا ڏند وڏا ۽ خمدار ٿين ٿا. انهن جي شڪل نيپال جي هڪ (خنجر نما) هٿيار ’ڪُڪُري‘ جهڙي ٿئي ٿي. ان ئي نسبت سان هنن بلائن جو هندي نالو ڪُڪُري پيو آهي. هي ننڍا وچولي قد جا نانگ ٿين ٿا، جيڪي جسماني طور مضبوط پر عادتن جي لحاظ کان سست هوندا آهن. خطري جي وقت شوڪارا نه ڪندا آهن پر جسم ويڙهي ويهي رهندا آهن. سندن پسنديده خوراڪ آنو آهي. اهي نانگ آنن جي خول کي پنهنجن ڊگهن ڏندن سان ڦاڙي اندريون مادو ڳيهي ويندا آهن. ڪڏهن ڪڏهن اهي نانگ آنن ۾ سوراخ ڪري اندر گهڙي ويندا آهن ۽ مواد چٽ ڪري ڇڏيندا آهن. اها بلا ڪڏهن ڪڏهن پنهنجا آنا به کائي ويندي آهي. ان جي خوراڪ ۾ جيت ماڪوڙا به شامل آهن. مادي مارچ کان مئي تائين اڌ درجن کن آنا ڏيندي آهي جن مان مئي کان جون تائين ٻچا ڦُٽي پون ٿا.