ڪالاباغ ريفرينڊم: خطرناڪ ڪارتوس

جا ڪھڙا کيت سڪا آهن؟ سچ اهو آهي تہ سنڌوءَ جي پاڻي کي پنجاب ۾ چار تالا لڳي چڪا آهن. ارادو غالبن اهو آهي تہ سنڌ جو آب حيات ستن تالن ۾ بند ڪيو وڃي.

ان لاءِ ريفرينڊم جي تجويز آندي وئي آهي. نہ رڳو تجويز آندي وئي آهي پر ان تجويز تي اتفاق راءِ لاءِ وڏن وزيرن جو اجلاس بہ طلب ڪيو ويو آهي. جيڪڏهن وڏن وزيرن کي دٻاءَ، دڙڪن ۽ لالچن جي ذريعي ”متفق“ ڪيو ويو تہ پوءِ ڇا ماڻهو پنھنجو موت خاموشيءَ سان قبول ڪندا؟ مون کي ڊپ آهي تہ ڪالاباغ ڊيم تي ريفرينڊم جي تجويز جا ٽي چار خطرناڪ پھلو ٿي سگهن ٿا.

(1) سڄي قوم کي ڪالاباغ ريفرينڊم جي سوال ۾ منجهائي ڪنھن ٻي اهم ۽ خفيہ ايجنڊا جي تڪميل جو ڪم هٿ ۾ کنيل ٿي سگهي ٿو. (2) سنڌ جي مزاحمتي قوت جي تازي ”ماپ تور“ يا اندازو لڳايو ويندو هوندو. (3) سنڌ کي سچ پچ ريفريندم جي زور تي پاڻيءَ کان محروم ڪري سگهجي ٿو ڇاڪاڻ تہ ريفرينڊم کي اهم اداري جي طاقت ۽ پنجاب جي قدرتي اڪثريت، ٻنہي جي حمايت حاصل هوندي.

اڳي چيو ويندو هو تہ ڪالاباغ اتفاق راءِ کانسواءِ نہ ٺھندو. ان سوال تي اڄ تائين اتفاق راءِ نہ ٿيو آهي. بلڪه سنڌ، بلوچستان ۽ سرحد اسيمبلين ان کي ٻہ ٻہ ٽي ڀيرا رد ڪيو آهي. انھن صوبن جو عوام بہ پنھنجي مرضي ظاهر ڪري چڪو آهي. پر هاڻي ريفرينڊم جي ڳالھہ آڏو آندي وئي آهي. ياد رهي تہ اڪيلي پنجاب جي آبادي ٽنہي صوبن کان وڌيڪ آهي. ان ريت پنجاب جي سياسي ۽ حاڪم دماغن ٽن صوبن جي هڪراءِ فيصلي کي بلڊوز ڪرڻ لاءِ اهو نئون طريقو تجويز ڪيو آهي.

جڏهن دليل کٽي ويندا آهن ۽ ٻيو ڪو بہ اخلاقي جواز نہ بچندو آهي تڏهن شيطاني دماغ نت نوان ٽڪساٽ ۽ رٿون جوڙيندا آهن. شيطان جو ٻيو ڪھڙو ڪم آهي؟ بس! هر وقت پيو ناانصافيءَ لاءِ ڀڙڪائيندو تہ جيئن خدا جي خلق پاڻ ۾ وڙهي پوي! سوال فقط اهو آهي تہ نيٺ پاڪستان ۾ وڏي صوبي ۾ ڪھڙي بک آهي؟ ڪھڙي ڏڪر منھن ڪڍيو آهي؟ ۽ سنڌ کي سڪائڻ جي قيمت تي پنجاب جي نيون زمينون سيراب ڪرڻ جون رٿون تيار ڪري. هن ڌرتيءَ کي دوزخ ۾ تبديل ڪرڻ جي رٿابندي ڇو پئي ڪئي وڃي؟

ڪو اسان جي ڳالھہ مڃي تہ سڀ کان پھريان ان ماڻهوءَ جو نالو ظاهر ڪري جنھن ڪالاباغ ٺاهڻ يا نہ ٺاهڻ بابت ريفرينڊم جي تجويز ڏني آهي. يقينن هي ماڻهو يا گروھہ هن وقت تمام حساس ۽ ملڪ کي نقصان ڏيندڙ صلاحون ڏيئي رهيو آهي. ڇاڪاڻ تہ سنڌ جي اقتصادي تباهي فقط سنڌ جي تباهي نہ هوندي پر اها صورتحال سڄي خطي تي اثر انداز ٿي سگهي ٿي. اها محض تجويز نہ آهي پر ننڍن صوبن جي عوامي راءِ خلاف خطرناڪ ڪارتوس آهي.