ڪاريهل، ڪارو هرڻ

ڪاريهل، ڪارو هرڻ Black Buck - Antilope cervicapra-

ڪاريهل، ڪارو هرڻ

ڪاريهل کيرٿر ۾ نه ٿيندو آهي. هن هرڻ جي جسماني ڊيگهه 1.2 ميٽر (4 فٽ) ۽ وزن 32 کان 43 ڪلو گرام ٿئي ٿو. هي بنيادي طرح کليل ميدانن ۽ خاردار ٻيلن جو جانور آهي. وڏي پئماني تي شڪار ڪري کاڌو وڃي ٿو، اهو ئي سبب آهي جو هن جو نسل هڪ موقعي تي بلڪل ختم ٿي ويو. ان جو رهائشي ماحول به ختم ٿيندو پيو وڃي، ان جي نسل کي هاڻي هٿرادو طور ٻيهر سنڀاليو ويوآهي.

ڪاريهل نـَر جي پٺيءَ ۽ ٽنگن جو رنگ گهرو ناسي ڪارو ٿئي ٿو. پيٽ ۽ ٽنگن جا اندريان پاسا اڇا هوندا اٿس. ان جي وڏين ڪارين اکين جي چوڌاري پِيلسرا اڇا چٽا هوندا آهن. ڪَن ڊگهڙا اٿس. سڱ فقط نـَر کي ٿيندا آهن، سڱ اڀا هوندا آهن ۽ انهن کي چار پنج وڪڙ ٿين ٿا. ڪاريهل نـَر ڪجهه وڌيڪ ڪارو ٿئي ٿو، مادي پِيلسري ناسي ٿئي ٿي.

مختلف ڌڻن ۾ پنجن کان پنجاهه جانور ڏٺا ويا آهن جن تي ڪنهن هڪ ڪاري هرڻ جي حڪومت هوندي آهي. ڪاريهل پنهنجن ڊگهن سِڱن ۽ جسماني حرڪتن سان برتري ڄمائيندا آهن. خطري وقت مادي هوا ۾ ٽپا ڏيندي آهي، ان کان پوءَ ٻيون ماديون به ٽپا ڏينديون آهن جيستائين ڪِه سڄو ڌڻ حرڪت ۾ اچي وڃي.

ڪاريهل جي خوراڪ گاهه ۽ ٻج آهي، ڪڏهن ڪڏهن کيتن ۾ به اچي پوندا آهن. مادي ڇهه مهينا پيٽ ڪندي آهي ۽ هڪ ٻچو ڄڻيندي آهي.

هن وقت اڇڙي ٿر ۾ اوڀرندي ناري جي ڀرپاسي ۾ هٿرادو طور ٻيهر ان جو نسل وڌايو ويو آهي. هونئن هي خوبصورت هرڻ هندستن کان سواءِ نيپال ۾ به ٿئي ٿو.