ڦيڪاري، هرولو، سياهه گوش

ڦيڪاري، هرولو، سياهه گوش Carcal -felis caracal-



ٻن کان ٽي فٽ ڊيگهه ۽ 6 کان 19 ڪلو وزن جي هن وڏي ٻلي کي صحرائي ماحول ۾ رهڻ سبب Desert lynx به چوندا آهن. ان جا اصل وطن آفريڪا ۽ ايشيا آهن، اهو ٻِلو رنگ جو هلڪو ناسي ٿئي ٿو. پيٽ اڇو، ڪَن وڏا ۽ اڀا ھوندا اٿس، جنهن تي ڪارا وار ٿين ٿا. ڪنن جو پٺيون حصو ڪارو ٿيندو اٿس، جنهن ڪري ان جو فارسي نالو ’سياهه گوش‛ پيو آهي. Carcal (ڪارا ڪُلڪ) اصل ترڪي ٻوليءَ جو نالو اٿس، جنھن جي معنيٰ به ساڳي يعني ’ڪارا ڪَن‛ آھي.

پنهنجي قدبت ۾ سڀ کان تيز رفتار ٻلو آهي، اڪثر رات جو شڪار تي نڪري ٿو. صبح ۽ شام جو به سها، ڪوئا ۽ پکي جهلي کائي ٿو ۽ شڪار کي پڪڙيندي ئي ماري وجھندو آھي، ٿورڙن فاصلن ۾ تمام ڦُـڙت آهي، شڪار تي اوچتي اُڇل سان جهٽ هڻي ٿو ۽ 10 فٽن تائين ٽپو ڏيئي شڪار کي جهپي وٺي ٿو، ان حرڪت ۾ هي ايترو ته تيز آهي جو جيڪڏهن ڪو پکي جان بچائڻ لاءِ اڏامي ٿو ته ان کي به ٽپو ڏيئي پڪڙي وٺي ٿو.

ڦيڪاري ٻلو صحرائي علائقن ۾ زمين دوز چُر ۾ ٻن ٽن پلونگڙن سان نظر ايندو آهي پر سائنسدان ٻڌائين ٿا ته هن اڪيلائي پسند جانور جي مادي 69 کان 81 ڏينهن پيٽ ڪري ٿي ۽ هڪ کان 6 ٻچا ڏئي ٿي. پنهنجي رهڻ جون سرحدون مقرر ڪندي آھي ۽ سيڙهه جي ڏرڙن يا ٻرن ۾ رهي ٿي. ڦيڪاري ماحول: 3 ۾ رھندي آھي.