ڇَليرو، ڇلو مرون، ڇلرو

ڇَليرو، ڇلو مرون، ڇلروPangolin or Scaly Anteater / Manis Crassicaudata /

ڇَليرو، ڇلو مرون، ڇلرو

هي مماليه ڪافي عجيب الخلقت آهي، ميٽوڙي (ناسي رنگ واري هن جانور جي جسم ۽ پٺي تي عام کل بدران هڪ ٻئي مٿان چڙهيل وڏا ڇلر ٿين ٿا. ان جو جسم 20 کان 23 انچ ۽ وزن 15 کان 18 ڪلو ٿئي ٿو. جسم ۾ ڊگهو آهي، ڊگهو پڇ ۽ نوڪدار منهن اٿس. ننڍڙو وات، ننڍڙا ڪَن، ننڍڙيون اکيون، اڳيان چنبا تمام ڊگها ۽ اندرئين پاسي وريل هوندا اٿس ته جيئن هي جانور پنهنجين ٽِڻين يا آڱرين جي ھڏين تي ھلي سگهي.

بنيادي طرح آفريڪا سان تعلق رکندڙ هن جانور سنڌ بلوچستان کي به پنهنجو وطن ٺاھي ڇڏيو آھي ۽ صحرائي حالتن سميت چراگاهن ۽ گرم ٻيلن ۾ به رهي ٿو. ڇَليرو تمام گول ٻر کوٽي ان ۾ اندر گـهري ننڊ ڪندو آهي. ڏينهن جو سمهندو آهي ۽ رات جو ماڪوڙا کائيندو آهي. نظر گهٽ اٿس پر سنگهڻ جي سٺي صلاحيت ھوندي اٿس، پنھنجو شڪار ڳولي ئي وٺندو آهي. اڏوهين جا دڙا پنهنجن تيز چنبن سان کوٽي ان جي ٻِرن ۾ پنهنجي ڊگهي گول ۽ چهٽندڙ زبان وجهي ڇڏيندو آهي، جنهن سان اڏوهيو چُـهٽي پونديون آهن. هن جانور کي ڏند ڪونه ٿين، ان ڪري ماڪوڙيون ڳيهي وڃي ٿو، هاضمي جو اهو نظام پکين ۾ هوندو آهي. بلڪل بي ضرر جانور آهي، هٿ لائبو ته خوف ۽ حفاظت ۾ پاڻ کي گول ويڙهي منهن به ان ۾ اندر لڪائي ڇڏيندو آهي. ان جانور جو نسل سڄي دنيا ۾ خطري هيٺ آهي. مادي ڇليرو 120 ڏينهن پيٽ ڪندي آهي ۽ ھڪ يا ٻه ٻچا ڏيندي آهي. هي ماحول : 5 جو مماليه آهي.