پٽاپٽي هاتار، چراخ

پٽاپٽي هاتار، چراخ Stripped Hyena - Hyaena Hyaena -

پٽاپٽي هاتار، چراخ

ڪتي جهڙي دوناڙ واري هن جانور جو نسلي طور تي ڪتي يا بگهڙ وغيره سان ڪوبه تعلق نه آهي پر پيرن جا نشان لڳ ڀڳ تهڙا ئي اٿس. اهو مماليه ۾ هڪ جدا ڪٽنب سان تعلق رکي ٿو. هاتار جي ڊيگهه هڪ ميٽر (ٽن فٽن کان مٿي) آهي، پڇ ننڍو 8 انچ کن جو ۽ بجدار هوندو اٿس، رنگ جو سرمائي يا ڀورو ناسي ٿئي ٿو، جنهن ۾ ڪارا پٽا هوندا آهن، ڪلها ۽ ڪنڌ مضبوط اٿس، پويون ٽنگون اڳين ٽنگن جي مقابلي ۾ ننڍيون پر تمام مضبوط ٿين ٿيون، پٺي مٿي کان پڇ تائين لهواري ٿئيس ٿي جنهن تي ڪنڌ کان وٺي آخر تائين گهاٽي بشڪ (mane) هوندي آهي، ڪن وڏا ۽ اڀا ٿينس ٿا، ڳچيءَ تي ڪارو ناسي پٽو، پٺيءَ کان پاسن تائين عمودي ۽ ٽنگن تي افقي پٽا هوندا اٿس.

ڏرڙن ۽ چرن ۾ رهي ٿو، رات جو نڪرندو آهي. بنيادي طور تي مُردار يا ڍونڍ خور آهي، جنهن جي تلاش ۾ پيو ڦرندو آهي، گوشت هڏي سميت ڪُرٽي کائي وڃي ٿو. ان جو گونهه ميٽوڙي رنگ جو هوندو آهي، ڪتا، رڍون ٻڪريون، ڪڪڙ ماري ٿو، ڪوئا، ڪڇون، پالتون جانور ۽ ميوو به کائي وڃي ٿو. جوڙو يا ڪٽنب ٺاهي رهندو آهي، ڪنڌ غير لچڪدار آهيس ۽ موڙي نه سگهندو آهي. اڪثر اڪيلو ست ديهون گهمندو آهي، خطرناڪ رولو جانور هئڻ ڪري ماڻهو ان کي ’ڏائڻ جو ڏاگهو‘ به چوندا آهن.

مادي 84 ڏينهن پيٽ ڪندي آهي ۽ هڪ کان پنج ٻَٺ ڄڻيندي آهي. هي ماحول : 4 جو جانور آهي