پاڪستان ۾ بي رحم سياسي مفادن جي جنگ

ہ، ”بينظير جي نااهليءَ جو فيصلو اسان لاءِ فڪر جي گهڙي آهي... احتساب صرف اپوزيشن تائين محدود نہ هجي“ غنوا صاحبہ! سنڌ جي عوام ۽ فقيرن تہ گهڻو اڳ پئي چيو تہ خبردار رهو، توهان پاڪستان جي خطرناڪ سياسي داءَ پيچن کان واقف ڪو نہ آهيو، پر توهان جو ڏوھہ ناهي! جنھن ناٽڪ سان مرتضيٰ ڀٽي کي قتل ڪيو ويو ان کي ڪو بہ جذباتي ماڻهو ايئن ئي ڏسندو! وقت جي طاقتور ادارن جو ڀرپور ناٽڪ بينظير کي منظر عام تان هٽائڻ لاءِ هو ۽ توهان ڏٺو تہ نيٺ ايئن ئي ٿيو. ڀٽي صاحب جي خلاف قومي اتحاد جي تحريڪ کان مرتضيٰ جي شهادت ۽ بينظير حڪومت کان وٺي، اڄ تائين سڄي راند اها ئي رهي آهي تہ ”ڀٽو خاندان“ کي گوڏا کوڙڻ تي مجبور ڪجي.

هاڻي، احتساب بئنچ جي فيصلي کانپوءِ اڳوڻو صدر مسٽر فاروق لغاري آمريڪا روانو ٿي ويو آهي. جتي هو آمريڪي پرڏيھي کاتي جي عيوضين سان ڳالهيون ڪندو. هو اتي ريس ڪورس جي گهوڙن تي ڪو نہ ڳالهائيندو. يقينن، سندس موضوع پاڪستاني سياست جي گهوڙي ڊوڙ ۾ ميمبرشپ وٺڻ آهي. سندس دليل هوندو تہ ”هاڻي جڏهن بينظير ڀٽو ۽ سڄو ڀٽو خاندان سياست کان ٻاهر آهي ۽ ميان نواز شريف مقبول گهوڙيسوار ڪو نہ رهيو آهي، تڏهن ملڪ ۾ قيادت جو وڏو سياسي بحران پيدا ٿيو آهي يا ٿيڻ وارو آهي... آئون اهو خال ڀري سگهان ٿو.... آئون (اڳوڻو صدر) فاروق لغاري، غلام مصطفيٰ کر، غلام مصطفيٰ جتوئي، نوابزادو نصرالله خان، پير صاحب پاڳارو.... يا ڪي ٻيا جيڪي توهان چاهيندا نواز شريف جي جاءِ تي راڄ هلائي سگهون ٿا.

ممڪن آهي تہ آمريڪا وري گرين سگنل ڏيئي ڇڏي. جيئن اها 1947ع کان ڏيندي پئي اچي. آمريڪا کي ڇا کپي؟ پنھنجا مفاد! جيڪو بھتر طرح حل ڪري سگهي!

ميان نواز شريف بہ سنڌ جي سياسي خلا کي سمجهي ويو آهي ۽ سمجهي ٿو تہ گورنر راڄ سبب عوام سان رابطو ٽٽي پيو آهي. هاڻي خدا خدا ڪري سيد غوث علي شاھہ کي گورنر جو چيف ايڊوائيزر مقرر ڪيو اٿس. توهان هن عهدي کي ڊي فيڪٽو وڏو وزير بہ چئي سگهو ٿا. پر مون کي حيرت ان ڳالھہ تي ناهي تہ ميان صاحب اهو فيصلو ڇو ڪيو؟ حيرت ان ڳالھہ تي آهي تہ جناب وزيراعظم صاحب ان فيصلي کان ميان شهباز شريف (وڏو وزير پنجاب) ۽ آرمي چيف کي بہ آگاھہ ڪيو آهي. آرمي چيف تہ خير آرمي چيف آهي، سوال اهو آهي تہ پنجاب جي وڏي وزير کي اهو ٻڌائڻ ڇو ضروري آهي تہ سنڌ ۾ فلاڻي صاحب کي گورنر جو چيف ايڊوائيزر مقرر ڪيو پيو وڃي!

گهوٽالي ۾ رڳو حزب اختلاف نہ پر حزب اقتدار بہ نظر اچي رهي آهي، الله خير ڪندو! پر، آئون اهو بہ سوچي رهيو آهيان تہ فاروق لغاري آمريڪا کان جيڪو آشيرواد وٺڻ ويو آهي، اهو وٺي ايندو؟ هن ملڪ لاءِ ڪا بہ اڳڪٿي ڪري سگهجي ٿي!