0000-00-00
داخلا نمبر 1575
عنوان هڪ وڏيرو ۽ ڏيڏر
شاخ هِيءَ سَئِنَ
پڙهيو ويو 7183
داخلا جو حوالو:
هن داخلا جون تصويرون نه مليون
هڪ وڏيرو ۽ ڏيڏر
وڏيري سائينءَ ڇا ڪيو آهي جو پنهنجن هارين نارين کي جهلي مسجد ۾ وٺي وڃي ٿو ۽ اتي ووٽرن کي مسجد شريف جو قسم وجهي کانئن ووٽ جي گهر ڪري ٿو:
”پر وڏيرا سائين ووٽ منهنجو آهي، ڪنهن کي به ڏيان. ڪهڙي خبر ته توکي ئي ڏيان، قسم ته نه وجهه!“
”نه، تون کڻ قسم مسجد شريف جو ته ووٽ مونکي ڏيندين!“
”ووٽ امانت آهي سائين. ضرور ڏيندس، قسم نه وجهه، اهو گناهه آهي.“
”نه، تون چئه ته ووٽ مون کي ڏيندين!“
”نه چوان ته!؟“
”پوءِ پاڻ سمجهين ٿو....“
”سمجهي ويس!“
ان کانپوءِ هاري هليو وڃي ٿو ۽ وڏيرو سائين ٻيو ووٽر جهلي اچي ٿو:
”جيڪڏهن مون کي ووٽ نه ڏيندين ته هيءَ مسجد شريف پڄندءِ!“
عام چوندون ٿيڻ واريون آهن ۽ هزارن جي تعداد ۾ برساتي ڏيڏر آسودن تلائن مان ٽپا ڏيئي جهنگن ڏانهن نڪري آيا آهن:
”ڏاڪ ... ڏاڪ! آئون توهان جو ليڊر آهيان. مون توهان لاءِ آسودن تلائن جو سک ڇڏيو آهي. مون کي ووٽ ڏيو. ڏاڪ ..... ڏاڪ! آئون توهان جو ليڊر آهيان.“
”پر اسان ته توکي پهريون ڀيرو ڏٺو آهي!“
”اڳين چونڊن ڀيري توهان ننڍڙا هئا... ڏاڪ ... ڏاڪ توهان کي خبر ناهي ته آئون توهان جو ڪيڏو وڏو ليڊر آهيان ڏاڪ..... ڏاڪ!“
”اسان توکي ووٽ نه ڏينداسون اسان جهانگيئڙن کي ووٽ ڏينداسون. آسودي تلاءَ جا ڏيڏر تون اسٽيج تان لهي وڃ!“
”ڀائرو! توهان يقين ڪيو ته سڄي سنسار ۾ آئون ئي توهان جو سچو پچو خير خواهه آهيان.... توهان جو ڀاڳ آهي جو مون جهڙو اميدوار مليو اٿو. ڏاڪ..... ڏاڪ!“
”تون اسان جو ڀاءُ نه آهين! تون ڏڪر واري زماني ۾ گپ ۾ گهڙي ويندو آهين! ڇا تون سنڌوءَ جو پاڻي واپس ڏياري سگهين ٿو؟“
”نه نه ... سنڌوءَ جي تيز وهڪري جي ڳالهه نه ڪيو. ان ۾ سڀ ڪجهه لڙهي ويندو آهي. تلائن جي ڳالهه ڪيو، ڍنڍن ۽ دٻن جي ڳالهه ڪيو. آئون حاضر آهيان، ڏاڪ... ڏاڪ“
”نه، اسان کي سنڌوءَ جو پاڻي کپي. جيڪڏهن سنڌوءَ جو پاڻي کپي. جيڪڏهن سنڌوءَ جو رخ واپس موڙي سگهين ته توکي ووٽ ڏيون. چئه ڇا ٿو چوين؟“
”ڏاڪ... ڏاڪ مون کي توهان ماڻهو ملڪ دشمن، روس ۽ هندستان جا ايجنٽ ٿا لڳو..... عوام توهان کي ناڪام ڪري ڇڏيندو.... ڏاڪ ...ڏاڪ!“ ڏيڏر خار مان اسٽيج تان لهي پڄارو ۾ چڙهي هليو ويو.
(هيءَ سين جمعو 11 نومبر 1988ع، روزانه هلال پاڪستان ڪراچي)