هاڻي اچو جعلي دستاويز ٺاهيندڙ مافيا تي ....

5 مارچ 1996ع

هاڻي اچو جعلي دستاويز ٺاهيندڙ مافيا تي ....



حڪومت، ڪراچيءَ ۾ ورلڊ ڪپ جون مئچون پر امن ماحول ۾ ڪرائي ثابت ڪيو آهي ته هاڻي دهشتگرديءَ تي وڏي حد تائين ضابطو اچي چڪو آهي، اها ٻي ڳالهه آهي ته اشتياق اظهر اينڊ ڪمپني جي اڃا تائين ايم ڪيو ايم پاران ”زور آزمائيءَ“ جي للڪار جاري آهي. ورلڊ ڪپ جون مئچون ڪراچيءَ ۾ بنا ڪنهن خراب واقعي جي ٿي گذريون، اها نه رڳو وڏي پر تمام وڏي ڳالهه آهي. جيڪڏهن بدنام دهشتگرد نعيم شري ۽ سندس ساٿي واقعي گرفتار ٿيا آهن ته پوءِ اها سچ پچ ته هڪ وڏي ڪاميابي آهي. سنڌي صحافت ۾ حڪومت کي ڪنهن ڪاميابيءَ تي مبارڪون ڏيڻ جي معنيٰ حڪومت جي اجائي ساراهه سمجهي ويندي آهي ۽ هڪدم ٺپو لڳي ويندو آهي ته ضمير وڪامجي ويو! بهرحال، ڪو ايئن نه ناهي ته هاڻي حڪومت کي مٿي هيٺان وهاڻو ڏيئي ٿڪ پٽڻ گهرجي. جيستائين دهشتگرديءَ جو ٻج ۽ پاڙ موجود آهي، دهشتگردي ختم نه ٿيندي. نصير الله بابر جو اهو چوڻ ته ”رينجرز واپس نه سڏايا ويندا ۽ اهو فورس ڪراچيءَ ۾ امن لاءِ مستقل فورس طور ڪم ڪندو رهندو.“ ثابت ڪري ٿو ته ”موت! موت!“ ڪندڙ موت جا سوداگر اڃا جيئرا آهن ۽ حڪومت کي مبارڪ ڏيڻ اٻهرائي ٿيندي.

دهشتگرديءَ جو هڪ رخ هٿياربند هو جيڪو هن وقت ”ڪوئن وانگر ٻرن ۾“ روپوش اهي. دهشتگرديءَ جو ٻيو رخ ”دهشتگردن جي امپورٽ ۽ هٿيارن جي سمگلنگ“ آهي. حڪومت هن وقت ”سڃاڻپ ڪارڊ مافيا“ جنهن کي قانوني طرح سڃاڻپ ڪارڊ عملو چيو ٿي ويو، هڪ اخبار صحيح شهه سرخي هنئي ته ”پاڪستاني شهرين وڪري لاءِ موجود! اگهه 1000 رپين کان 5000 رپيا فقط“ پاڪستاني ماڻهو انهن غير ملڪين کي محض ان پاڻيءَ جي تلاش ۾ نڪتل پکي ڪونه ٿا سمجهن. سڀ افغاني ۽ علائقه غير سان تعلق رکندڙ اڪثريت جيڪا ڪراچيءَ ۾ موجود آهي، مختلف مافيائن جا ڪارڪن آهن. هٿيار، نشو، ٽرانسپورٽ، ٺيڪيداري، خرڪار ڪئمپن لاءِ اغوا، ڀاڙي تي قتل، قبضه گيري ۽ بي هر بدمعاشيءَ ۾ انهن غير ملڪين جي اڪثريت جو هٿ آهي. انهن سڀني مافيائن ڪراچيءَ جي شهري ۾ شهري فضيلتن جو جيڪو قتلام ڪيو آهي، ان جو ڪاٿو اڃا تائين انساني حقن واري ڪنهن به تنظيم ڪو نه لڳايو آهي. سڀني مافيائن جا ميمبر معصوميت جا نقا پائي ”ويچارا ترس جوڳا“ شهري بڻجي ويا آهن ۽ انساني حقن جون تنظيمون بنا سوچڻ سمجهڻ جي سندن همدرد بڻجي ويون آهن.

هڪ سال ۾ سوال لک غير ملڪي، رشوت کارائي سڃاڻپ ڪارڊ وٺي چڪا آهن، في غير ملڪي هڪ هزار رپيا جي حساب سان ساڍا 12 ڪروڙ رپيا رشوت فقط سڃاڻپ ڪارڊ مافيا ڪمائي، جيڪڏهن اگهه 5000 رپيا في ڪارڊ هليو آهي ته اها رقم پنجوڻ تي يعني 60 ڪروڙ رپين کان چڙهي وڃي ٿي. نصيرالله بابر ته رڳو بندوق بردار دهشتگردن تي اک رکيو ويٺو آهي. عير ملڪي دهشتگردن تي، جيڪي بندوق کانسواءِ ئي شهرن تي قابض ٿي عوام ۽ حڪومت کي ڏند ڏيندا رهيا آهن، انهن تي ضابطو اڃا ڪو نه آيو آهي ۽ نه وري پاڪستان سرڪار جي مکيه کاتن ۾ ويٺل ”شهريت وڪڻندڙ“ يا شهرين ٺاهي ڏين جو بندوبست ڪري ڏيندڙ غير ملڪي ايجنٽن کي سوگهو ڪيو ويو آهي. ان ئي شهريت بدلائي ڏيندڙ مافيا جو ٻيو اهم اڏو پاسپورٽ ڊپارٽمينٽ آهي. ان اڏي تي ڪڏهن ڇاپو لڳندو؟

غير ملڪي ماڻهن جو ڏوهن ۾ اهم ترين ڪردار آهي اها ڳالهه رڳو فيشن طور چوڻ جي نه آهي. ان راءِ تي ملڪ جو هر ماڻهو ۽ وفاق توڻي سڀ صوبائي حڪومتون هڪراءِ آهن. هي پرڏيهي ماڻهو، جيڪي خدا ڄاڻي ته پنهنجن ملڪن ۾ ڪهڙا سنگين ڏوهه ڪري پاڪستان ڀڳا آهن ۽ ڪهڙن ڪوڙن سچن نالن سان پاڪستان ۾ داخل ٿي، نالا ڦيرائي پاڪستاني بڻجي سنڌ جي ڪلهن تي سوار ٿيا آهن، چپ چپات ۾ ڪجهه اهڙي طرح اڇي ڪاري جا مالڪ ٿيندا پيا وڃن جو جيڪڏهن ايم ڪيو ايم ايئن ڪري ها ته الائي ڇا ڪري وجهي ها! اها بدقسمتي ”مهاجر“ ماڻهن جي آهي جن کي سندن قيادت رياست سان ويڙهائڻ ۾ ننهن چوٽيءَ جو زور هڻي ڇڏيو ۽ کين سنڌ جي سياسي رڻ ڀونءَ ڏانهن ڌڪي لاشن جا انبار هڻائي ڇڏيا. ايم ڪيو ايم جي قيادت کان ته روايتي مافيا بهتر ڪارڪردگي ڪري وئي جنهن ماٺ ميٺ ۾ پنهنجي حق ۾ اهو سڀ ڪجهه ڪاميابيءَ سان حاصل ڪيو جيڪو الطاف حسين پنهنجي لاءِ ڪرڻ چاهيو پر هڪ ڌٻڻ ۾ ڳچي ان ۾ لهندو هليو ويو.

پاڪستان جي گهرو معاملن واري وزارت هاڻي ”دستاويز مافيا“ جي ڪڍ ڪات ڪهڙا کڻي نڪري ته چڱو! ڇاڪاڻ ته اها ئي مافيا اصل ۾ ٻين مافيائن جي لشڪرن ۾ ڀرتين جا دفتر کولي ويٺي آهي. ان مافيا هر ڪو ايڏي ته صفائيءَ سان ڪيو آهي جو ڪاغذن ذريعي کري ۽ کوٽي جي سڃاڻپ ممڪن نه رهي آهي. اها ٻي ڳالهه آهي ته بنگالي، افغاني ۽ ٻيا غير ملڪي ماڻهو سلوار قميصون پائڻ جي باوجود پنهنجا چهرا، چال ۽ زبان جو فرق ختم ڪري نه سگهيا آهن ۽ اهو ئي سندن اصل ”شهريت“ جو تعين ڪرڻ جو سڀ کان مکيه ذريعو آهي.