نازڪ ڪمن جو نازڪ انجام

شايد اهو ضروري هو.

الله تعاليٰ جو رضا تي بي عيب دنبو قربان ٿيندو آهي. شهنشاھہ جمهوريت جي اک جي حفيف اشاري تي ذهين ترين دماغ قربان ٿيندو آهي. هڪ پاسي ماڻهو سنت ابراهيمي ادا ڪري رهيا هئا، ٻي پاسي بادشاهي فرض پورا ٿي رهيا هئا. جنھن وقت خدا جي خلق عيد جي نماز ۾ ملڪ جي سربلندي ۽ بقا جون دعائون گهري رهي هئي، ان وقت خبر اچي رهي هئي تہ ست گولڊ ميڊل يافتہ پاڪستان جي ايٽمي سائنسدان ڊاڪٽر عبدالقدير خان تفتيش دوران قبول ڪيو آهي تہ هن اتر ڪوريا، لبيا ۽ ايران کي ايٽمي ٽيڪنالاجيءَ بابت معلومات ڏني آهي.

ڊاڪٽر صاحب بظاهر اهو ڪم ڏھہ سال اڳ جوش ايمانيءَ ۾ ڪيو هو پر هو اها وضاحت ڪري نہ سگهيو تہ اتر ڪوريا جي مدد ۾ ايماني جذبو ڪيئن بيدار ٿيو. اسان جي ڳوٺاڻي دوست ڪرڙ خان ان موقعي تي هڪدم چيو، ”پئسا سائين پئسا!“ سندس خيال آهي تہ ڊاڪٽر قدير خان جي قربانيءَ کي ان مهل قرباني قرار ڏيئي سگهجي ها، جڏهن هن مڪمل طور جذبہ ايمانيءَ ۾ سرشار ٿي ايٽمي ڄاڻ فراهم ڪئي هجي ها! پر هن تہ پڪ ئي پڪ پئسن تي پنھنجو پاڻ کي قربان ڪري ڇڏيو.

پاڪستان جي وقار تي ڊاڪٽر قدير کي قربان ڪيو ويو يا ڊاڪٽر قدير خان ذاتي مفاد خاطر پاڪستان جي وقار کي قربان ڪيو؟ ٻنہي مان ڪجھہ تہ ٿيو آهي، جيڪو يقينن چڱو نہ ٿيوآهي. ان سان پاڪستان جي پوزيشن عالمي سطح تي سوال هيٺ آئي آهي. پاڪستان جي پوزيشن معنيٰ پاڪستان ۾ رهندڙ خدا جي خلق جا مفاد ۽ زندگيون، ان هوندي بہ پاڪستان جي ماڻهن کي ڊاڪٽر قدير سان همدرديون ڏسجن ٿيون. ماڻهو جنھن کي ”هيرو“ قبول ڪندا آهن ان جي ذلت کانئن ڏٺي نہ ٿيندي آهي.

هاڻي ڊاڪٽر قدير تي عدالت ۾ ڪيس هلندو تہ هن ايٽمي معلومات ٻين ملڪن کي منتقل ڇو ڪئي آهي؟ ٺيڪ! پر سوال اهو آهي تہ ڇا ايٽمي معلومات هاڻي فقط انھن ٽن ملڪن وٽ آهي. جن کي ڊاڪٽر قدير خان مهيا ڪئي يا اها ٻين ملڪن وٽ بہ آهي؟ ٻين ملڪن کي اها انسان – دشمن ڄاڻ ڪنھن ڏني ۽ اهي ملڪ اها ڄاڻ اڃا ڇو وڌائي رهيا آهن؟ ڇا ان سوال تي ٻين ملڪن ۽ انھن جي سائنسدانن کان پڇاڻو نہ ٿيندو؟ ۽ ڇا اهي ملڪ پنھنجن دوست ملڪن کي اها معلومات فراهم ڪو نہ پيا ڪن؟ انصاف هر هنڌ ٿيڻ گهرجي، نہ تہ ناانصافي صاف نظر ايندي.

ڊاڪٽر قدير واري بيان کانپوءِ اهو سوال ڏاڍي شدت سان اڀري رهيو آهي تہ ڇا ايٽمي توانائيءَ جي ڦهلاءَ جو ذميوار فقط ڊاڪٽر قدير آهي يا ان خطرناڪ عمل ۾ دنيا جا خاص ڪري يورپ ۽ آمريڪا جا سائنسدان ۽ ملڪ وڌيڪ ملوث آهن. اها ٽيڪنالاجي اڄ بہ ڪھڙي خطي ۾ وڌيڪ موجود آهي ۽ ڪٿان جي سائنسدانن ان کي اڳتي وڌايو آهي؟ ڏٺو وڃي تہ ان جو ابتداڪار خود اهو ئي آهي جيڪو اڄ دنيا تي خدائي فوجدار وانگر لٺ کڻي بيٺو آهي.