2020-10-27
داخلا نمبر 880
عنوان نئگ ۽ نگهاول ڏانهن ٻيهر
شاخ منڇر گورک گاج دنيا
پڙهيو ويو 21561
داخلا جو حوالو:
هن داخلا جون تصويرون نه مليون
نئگ ۽ نگهاول ڏانهن ٻيهر
نئون ڏينهن شروع ٿيو ته صبح جو 40: 6 وڳي سيوهڻ جو ريسٽ هائوس ڇڏي جيپ ٻيهر اولهه طرف جهانگارن واري واٽ سان بگاشير ڏانهن رخ ڪيو. نئينگ وٽان علي سائينيءَ جي تِريءَ جي تصوير چٽي نه نڪتي هئي. محمد علي تصوير مان مطمئن ڪو نه هو، ان ڪري صبح سوير جڏهن سج اڃا اوڀر ۾ هجي جبل کي ويجهو وڃي هڪ ٻي ڪوشش ڪرڻ ضروري هئي. ان کان پوءِ بگا شير مان غلام محمد نوحاڻي کي سونهون ڪري کڻڻو هو ته جيئن بٺي ٺل وٽ قديم تحريرن تائين وٺي هلي، ان کان پوءِ گاجي شاهه ۽ هليلي!
”محنت اسان به اوتري ٿا ڪريون جيتري نيشنل جاگرافيءَ وارا ڪن ٿا پر اهو فرق ضرور آهي ته اسان وٽ موسمون خاص ڪري اونهاري جي، ڪافي سخت آهي، سواءِ ان جي ته هو قطبن ۾ ويندا هجن، يا برف باريءَ ۾ هجن. ظاهر آهي ته اتي تڪليف ضرور ٿيندي هوندي! پر هنن کي ڪي سهولتون هونديون آهن، هڪ ته هنن وٽ وقت آهي، اسان وانگر تمام محدود وقت ڪو نه هوندو اٿن، ٻيو ته هنن وٽ وڏا فنڊ ٿين ٿا ۽ هنن کي گهربل هر سامان هنن وٽ موجود هجي ٿو. مثال: جيئن هاڻي اسان موسم جي خرابيءَ سبب فوٽو نٿا ڪڍي سگهون، ممڪن آهي ته هنن وٽ اهڙيون ڪئمرائون يا اوزار هجن جيڪي موسم جي سختيءَ کي منهن ڏيئي سگهن. ائين ڏسو ته اسان جون گاڏيون هلندي هلندي بيهي رهن ٿيون، ممڪن آهي ته هنن وٽ خاص قسم جون گاڏيون ۽ سهولتون هجن، ايئن هنن وٽ وسيلا ۽ سامان اسان کان وڌيڪ آهي، باقي محنت اسان به اوڏي ٿا ڪريون.“ بخاري صاحب اسان ديسي ۽ هنن ولايتي ماڻهن جي ڪم ۽ سهوليتن جي ڀيٽ ڪئي.
جهانگارن پهتاسون ته 5: 7 ٿيا هئا. رستي کان ساڄي پاسي پراڻو قبو نظر پئي آيو. اسان وٽ وري به وقت نه هو پر پاڻ جهلي نه سگهياسون ۽ مقبري وٽ گاڏي بيهاري لهي پياسون.