مرزا سليمان جي رانئڪ

مرزا سليمان جي رانئڪ:

مرزا سليمان مرزا عيسيٰ خان (اول) ترخان جو پٽ هو. سندس قبر تي وفات جي تاريخ 964 هه (1557ع) لکيل آهي. قبرستان پٿر جي سادي چؤديواريءَ ۾ آهي. چؤديواريءَ کي ڏکڻ ۽ اوڀر کان لنگهه آهن. اولهه پاسي ديوار ۾ محراب ٻاهر نڪتل آهي. محراب ۾ ڪا آرائش نه آهي، البت اها اَٺاس جي اڌ واري طرز تي آهي، ۽ سينڌ وانگر نوڪدار ونگ اٿس. ان محراب وٽ آرائش فقط محراب جي ٻنهي پاسي کان ٻاهر سنڌي طرز جي پاون جي آهي.

احاطي جي وچ تي لڳ ڀڳ 48X36 ماپ جو ساڍا چار فٽ اوچو مستطيل ٿلهو ٺهيل آهي، جنهن کي ڏکڻ پاسي کان ڏاڪا آهن. هن ٿلهي تي پٿرن جون گهڙيل 13 قبرون آهن. انهن مان مرڪزي مکيه قبر مرزا سليمان جي آهي. اها ٻه منزله ٿلهي سان پيتي نما تعويذي قبر آهي. ان جي سيرانديءَ کان ’چراغ دان‘ ٺُلهه بيهاريو ويو آهي ان چوڪور ٺلهه جي مٿئين حصي ۾ ڏيئا رکڻ لاءِ محرابي جارا ٺهيل آهن ۽ چوٽيءَ تي پڳ رکيل آهي. سڄي مڪليءَ ۾ چراغ دان ٺلهه جو هي اڪيلو نمونو آهي.

قبر جي تعويذ جي پاسن تي ڊزائينون ۽ عربي تحرير ۾ مرزا سليمان جو نالو ۽ وفات جو سن اُڪريل آهي. مٿان سيرانديءَ طرف ڪلمو شريف، وچ ۾ گلڪاري ۽ پيرانديءَ جي مٿان تاريخ اُڪر آهي. ٻين سڀني قبرن جو نمونو به ساڳيو آهي پر انهن تي سيراندي پٿر يا چراغ دان ڪونه آهي.