لائيڪوڊان اَوليِڪَس

لائيڪوڊان اَوليِڪَس / Common Wolf snake / Lycodon aulicus



هن ننڍڙي بلا جي ڊيگهه 530 ملي ميٽر کان 570 ملي ميٽر ) تقريباََ پوڻا ٻه فٽ)، پڇ 130 ملي ميٽر کان 140 ملي ميٽر هوندو آهي. اها وڌ ۾ وڌ اڍائي فٽ ريڪارڊ ڪئي وئي آهي. هن جو جسم مِٽيائون ٿئي ٿو جن تي درجن ڏيڍ اڇيون پاسيريون پٽيون ٿين ٿيون. ڪڏهن ڪڏهن پاسيريون پٽيون گم هونديون آهن ۽ فقط اڇا چُٽا رهجي ويندا آهن. هن بلا جو هِندي نالو ’ڪوڙيالا ‘۽ گجراتيءَ ۾ ’چِٽالو‘ آهي. لائڪوڊان Lycodon معنيٰ ’بگهڙن جهڙن ڏندن وارو‘۽ اَوليِڪَس aulicusمعنيٰ ’گهر ۾ رهندڙ‘. پنهنجي جنس جي ٻين بلائن وانگر هيءَ به عام طور ڏرڙن ۾، پٿرن ۽ ڇوڏن جي هيٺان ۽ کڏن کوٻن ۾ ملندي آهي. رات جو شڪار لاءِ نڪرندي آهي. مارچ کان مئي تائين اڌ درجن کن آنا ڏيندي آهي جن مان مئي کان جولاءِ تائين ٻچا ڦُٽي پوندا آهن. هن بلا جو ڦهلاءُ تمام وڏي علائقي ۾ آهي. اها ملايا جي ٻيٽن، هانگ ڪانگ، فلپائين، چين، آسام ۽ بنگلا ديش کان وٺي هندستان ۽ پاڪستان ۾ ٿئي ٿي.