0000-00-00
داخلا نمبر 1631
عنوان عظيم مرڪزيت جو ڪينسر ۽ سول ادارن تي الزام
شاخ سنڌ ڪيس
پڙهيو ويو 8916
داخلا جو حوالو:
هن داخلا جون تصويرون نه مليون
يڪڏهن ٿاڻو هڪ ڏينھن خالي ٿيو تہ ملڪ خالي ٿي ويندو. وزيراعظم ۽ صدر صاحب سمجهن ٿا تہ ملڪ جي ڌرتيءَ جو بار سندن ڪلهن تي ايئن آهي جيئن هر ڪيولس جي ڪلهي تي ڌرتيءَ جو گولو سو سڄو بار ميان صاحب ۽ تارڙ صاحب جي ڪلهي تي آهي. واپڊا وارا اونداهي ڪرڻ جي باوجود سمجهن ٿا تہ ملڪ سندن دم سان روشن آهي. بئنڪون، خاص ڪري اسٽيٽ بئنڪ سمجهي ٿي تہ ان جون معاشي پاليسيون ملڪ کي کنيو بيٺيون آهن.
حقيقت رڳو اها آهي تہ ضرورت کان وڌيڪ مرڪزيت ملڪ جو ٻيڙو ٻوڙيو آهي ۽ پاڪستان ۾ مرڪزيت جِي ايڇ ڪيو وٽ آهي (پارليامينٽ ۽ ٻيا ادارا عملي طور سنڌ اسيمبليءَ جھڙا بي وس آهن!) عالمي بئنڪ زور تہ عدم مرڪزيت تي ڏنو آهي پر سڀني سول ۽ سياسي ادارن کي تنقيد جو نشانو بڻائي فوج جي اداري تي خاموشي اختيار ڪئي آهي، جيڪو مرڪزيت جو بنياد آهي ۽ جيڪو الله جي رسيءَ وانگر پاڪستان جي سڀني صوبن جي سڀني مسئلن کي ڇڪي مضبوطيءَ سان سنڀالي بيٺو آهي.
عالمي بئنڪ چيو ”ملازمن جون پگهارون گهٽ آهن، ان ڪري ڪرپشن وڌيڪ آهي“ اها ڳالھہ هڪ حد تائين درست آهي پر عملي طور ڏسو تہ جيڪو جيتري وڏي گريڊ ۾ پگهار وارو ۽ وڏين سهوليتن وارو آهي. اهو ئي وڌيڪ ڪرپٽ آهي. پاڪستان ۾ سڀ کان وڏيون پگهارون، سهوليتون، نوڪر چاڪر ڪھڙي کاتي جي اعليٰ ترين عملدارن کي آهن؟ آئون چپ ٿو رهان، وڃو ۽ وڃي ڏسو، سڄو ملڪ پاڪستان پيواٿو سول بيورو ڪريٽن جون جي او آر ڪالونيون بہ گهمو ۽ ٻين غير سول ادارن جي سربراهن جون رهائش گاهون بہ ڏسو!
حد اها تہ عالمي بئنڪ مخصوص نوڪريون ڪانٽريٽ جي بنياد تي ڏيڻ جي سفارش ڪئي آهي. اهي ڪانٽريڪٽي ملازم سنڌ جي ڪانٽريڪٽي ڊاڪٽرن جھڙا بيوس ڪو نہ هوندا. بلڪه ملڪ جي مرڪزيت جا قائم دائم نشان ۽ عالمي بئنڪ جو منظور ڪرده يا سفارشي عملدار ئي هوندا. جيڪي ورلڊ بئنڪ، آءِ ايم ايف ۽ پاڪستان جي اصل طاقت جي وچ ۾ رابطا آفيسر هوندا. آئينو تہ اهو ئي ڪجھہ ڏيکاري ٿو ۽ آئون ان آئيني تي پڙدو وجهي نٿو سگهان!