شهر ٺريا ته ٻهراڙيون ٻرڻ لڳيون

شهر ٺريا ته ٻهراڙيون ٻرڻ لڳيون



ٿي سگهي ٿو ته نعيم شريءَ جو موت ڪراچي لاءِ ”سورٺ مئي سک ٿيو“ ثابت ٿئي ۽ رينجرز جي صورت ۾ لٿل ”کنگهار“ پنهنجا خيما کڻڻ لاءِ سوچين! پر هاڻي اوچتو ئي سنڌ جون ٻهراڙيون هڪ ڀيرو ٻيهر ڇو ٻرڻ لڳيون آهن؟ ٻهراڙين ۾ مار ڌاڙ جو نئون دور ڪجهه اهڙي ريت شروع ٿيو آهي جو لڳي ٿو ته 1984ع کان 1992ع تائين وارو ”ڌاڙيل راڄ“ ٻيهر لڳي ويو آهي ۽ هاني سنڌ جا روڊ رستا ٻيهر ويران ٿي ويندا.

هفتو کن اڳ تعلقي ڪشمور ۾ مريد شاخ وٽ اهڙي هنڌ ڌاڙيلن ٻه ڪلاڪ روڊ بلاڪ ڪري ڦر ڪئي جو سنڌ، بلوچستان ۽ پنجاب ڏانهن ايندڙ ويندڙ گاڏيون لٽجي ويون. هن موقعي تي ”قافله نظام“ ۽ ذميوار پوليس ڪٿي هئي؟ ان سوال جو جواب حڪومت پاڻ تلاش ڪري. ڪالهوڪيون اخبارون هالا لڳ ڌاڙيلن جي دردناڪ ڪاهه جي احوال سان ڀريل اهن، هڪ اهڙي ڪاهه جنهن ۾ ڌاڙيل هڪ ڳوٺ تي حملو ڪري اوطاق ۾ ويٺل 5 ڄڻا اغوا ۽ ٻه ڄڻا قتل ڪري وجهن ٿا. حڪومت جي ناقص حفاظتي انتظامن سبب ڪنهن جي زندگي داءَ تي ناهي؟ هوڏانهن ڌاڙيلن جي ڀاڙيائپ ته ڏسو (جنهن کي هو دليري ٿا سمجهن) ته بندوق جي نوڪ تي قطار ۾ بيهاريل ماڻهن کي چون ٿا ”مرڻ کان اڳ ڪلمو پڙهو!“ ۽ پوءَ گولين جو مينهن وسي ٿو ۽ ڌرتي رت ڦڙا ٿي وڃي ٿي! ڌاڙيل ڊپٽي کوسي جي هيءَ ڪارروائي ڪجهه اهڙي ئي هئي جهڙي ڪراچيءَ ۾ نعيم شيريءَ جهڙا ”بزدل ڪوئا“ ڪندا رهيا ۽ نيٺ جڏهن مئا ته جهنگلي مرونءَ وانگر مئا.

ساڳي تاريخ تي بدين ضلعي ۾ ماتليءَ لڳ سانوڻ فقير جي ميڙي تان موٽندڙ 8 ڄڻا اغوا ٿي وڃن ٿا، اهي ٻي ڳالهه آهي ته ڌاڙيل انهن مان 6 ڄڻن کي ”گهربل آساميون“ نه سمجهي ڇڏي ڏين ٿا. ماتليءَ جي تاريخ ۾ ههڙو واقعو گذريل ڌاڙيل راڄ ۾ به شايد ئي ٿيو هجي! نئين راڄ جي ابتدا مهل ماتليءَ جو گرم ٿيڻ نظر انداز ڪرڻ جهڙي ڳالهه نه آهي. هوڏانهن ٽنڊي آدم ۽ ٽنڊي الهيار وارا پاسا آهن جتي ”وڏا پٽڪا“ ڌاڙيلن جا سرپرست ٿيو ويٺا آهن ۽ پوليس ٽنڊي آدم مان ٻه مهينا اڳ اغوا ٿيل ٻن هندو نوجوانن جو ڪو اتو پتو ڪڍي نه سگهي آهي. دادو ۽ لاڙڪاڻو به ڌاڙيلن جي بندوقن سان ٻيهر ڌڌڪڻ لڳا آهن.

ڪو ايئن به ناهي ته پوليس هٿ تي هٿ رکي ويٺي آهي. ظاهري طرح ڪچي ۽ پڪي ۾ ”وڏو آپريشن“ هلندڙ آهي پر هي ڪهڙو آپريشن آهي جو ڌاڙيلن کٽن ئي نٿا! شايد ئي ڪو باندي هجي جيڪو بنا ڀنگ ڏيڻ جي موٽندو هجي. ايم ڪيو ايم جا دهشتگرد ٽن ساڍن ٽن سالن ۾ اچي کٽا آهن پر حيرت آهي ته 1992ع ۾ کٽل ڌاڙيل 1996ع ۾ ٻيهر ”اوتري جا اوترا“ ٿي ويا اهن. پر، هيءَ ٽائمنگ به عجيب آهي! اهو هڪ اهم سوال آهي ته آخر ڌاڙيلن ان وقت سرگرم ٿيڻ جو فيصلو ڇو ڪيو آهي جڏهن ڪراچيءَ جا دهشتگرد ذري گهٽ ختم ٿين تي آهن، ڇا ڪو نئون محاذ کليو آهي؟ ڇا اها ايم ڪيو ايم جي مورچن کي بچائڻ جي حڪمت عملي آهي؟ يا ڪو نئون سياسي موڙ اچڻ وارو آهي؟