سچ ضرور ڳالهايو پر زور سان

16 سيپٽمبر 1995ع

سچ ضرور ڳالهايو پر زور سان



سنڌي دانشورن جو ميڙ سنڌ جو ڪيس کڻي اسلام آباد پهتو آهي، کيس جس ڏيڻ جي معنيٰ اها ٿيندي ته هنن سنڌ ۽ سنڌين تي ڪو ٿورو ڪيو آهي. هنن ڪو به احسان نه ڪيو آهي، اها سندن ذميواري هئي، جيڪا دير سان پوري ڪئي وئي آهي. اها ذميواري ته ٻين به گهڻن صاحبن جي هئي جيڪي پوئتي رهجي ويا، انهن کي ڏوراپو ضرور ڏيو.

اسان جا دوست سچ ڳالهائين ٿا پر ايترو هوريان ۽ ايتري ”ننڍڙي ڪمري“ ۾ جواب ان جو پڙاڏو در به ٽٽي نه سگهي. سڙٻاٽن ۾ ڳالهائڻ جو وقت ان ڪري لنگهي ويو آهي جو ڪوڙ جي ”مڇي مارڪيٽ“ ۾ سچ ڳالهائيندڙن جو آواز ننڍو ٿي ويو آهي. اکيون ٻوٽن سان ڪجهه به نه ورندو. اها ڳالهه قبول ڪرڻ ۾ شرم جي ڳالهه نه آهي ته عالمي نشرياتي ادارن تان پل پل ڳالهائجندڙ ڪوڙ جو مقابلو ڪرڻ سنڌي اخبارن جي وس کان ٻاهر آهي. ضروري آهي ته سنڌ جو ڪيس وڙهندڙ هر شخص سنڌ کان ٻاهر، سنڌي پريس کان ٻاهر، سنڌ جي اوطاقن ۽ هوٽلن کان ٻاهر، ديس پرديس ۾ هر هنڌ ڳالهائي. نه رڳو ڳالهائي پر ايترو زور سان ۽ ايترو گهڻو ڳالهائي جو سچ کي به ٻڌو ۽ سمجهيو وڃي.

سنڌ زماني کان رڙيون ڪندي پئي آئي ته اهي رهنمائو! اي اڳواڻو! اٿو ۽ سنڌ جي حقن جو آواز اٿاريو، پاڻ ۾ ٺهو، هڪٻئي جي ڳچيءَ ۾ هٿ وجهڻ بدران هڪ ٻئي جي هٿ ۾ هٿ ڏيو. هاڻي جڏهن سنڌ جا دانشور لاهور ۽ اسلام آباد ۾ سنڌ جو ڪيس سنڌ جو موقف کڻي پهتا آهن ته گهڻي دير ٿي چڪي آهي. اها وري به خوشي جي ڳالهه آهي ته دير سان سهي، سنڌ جون سڀ ڌريون ان تي متفق ٿيون آهن ته سنڌ جا ڏک ۽ سچ انهن کي ٻڌايا وڃن جيڪي نه دوست هئا نه دشمن پر ڪوڙي پرچار سبب آهي سنڌين کي ”ناحق“ ڪندڙن جي قطار ۾ بيهاريندا پئي ويا.

سپريم ڪورٽ، لاهور ۽ اسلام آباد بيحد مناسب مرڪز آهن، جتان ”سنڌ ڪيس“ بهتر طور وڙهي سگهجي ٿو؛ جتي عدالت، عوام ۽ عوامي نمائندن جي ذهنن ۾ سنڌين خلاف ڀريل زهر جو اثر گهٽائي ختم ڪري سگهجي ٿو. ان مقصد لاءِ پشاور کي وسارڻ نه گهرجي ڇاڪاڻ ته پٺاڻن جي هڪ مخصوص قيادت پٺاڻن جي ذهنن کي وڪوڙي سندن مينڊيٽ سنڌين خلاف ۽ ايم ڪيو ايم جي حق ۾ استعمال ڪري رهي آهي.

ممتاز ڀٽو سنڌ جو ڪيس کڻي برطانيا ويو، جس هن کي به نه ڏبي ڇاڪاڻ ته اهو سندس فرض هو جيڪو هن پورو ڪيو. لاهور، اسلام آباد ۽ برطانيا ۾ سنڌ ڪيس جو پيش ٿيڻ ”برسات جون پهريون ڦڙيون“ ثابت ٿيڻ گهرجن، پر، سنڌي ماڻهو انهن ٽن شهرن تائين ان وقت پهتا آهن، جڏهن ايم ڪيو ايم منيلا کان آمريڪا تائين ”مهاجر ڪيس“ جو هفتو هلائي رهي آهي ۽ بي بي سي، زي ٽي وي، وائس آف آمريڪا ۽ وائيس آف جرمنيءَ سميت پاڪستان جي سڄي اڙدو ۽ اڪثر انگريزي پريس سندس وات بڻيل آهي. ان ڪري هر هنڌ ۽ هر سطح تي ”سنڌ ڪيس“ جو وڙهڻ جي حوالي سان سنڌ جي سڀني قومپرست ۽ جمهوريت پسنڌ ڌرين جو ون پوائنٽ اتحاد ضروري ٿي پيو آهي....... ۽ ضروري آهي ته برسات جون هي پهريون ڦڙيون ڪنهن رولاڪ بادل جي بوندن بدران وڏو ڦڙو ٿي وسن.