سنڌوءَ ڪناري هڪ عظيم اڃ جا اڏيل خيما

ان کان انڪار نٿو ڪيان، پر مون کي اهي قوتون ۽ تحريڪون (زودار تحريڪون) جيڪي سنڌ جي مستقبل کي سنواري سگهن، ڏسڻ ۾ ڪو نہ ٿيون اچن. آئون سياسي قوتن کان بہ وڌيڪ جاگرافي، تاريخ ۽ جيالاجيءَ جي قوتن تي ڀاڙڻ لاءِ مجبور آهيان. جيڪي قومن کي يا تہ زمين ۾ دفن ڪري ڇڏينديون آهن، يا زمين جي پاتال مان ڪڍي ٻاهر ڪنديون آهن. اهي ئي قوتون عوام جي عظيم قوت کي جيئڻ لاءِ مجبور ڪري ڪنھن نہ ڪنھن رخ ۾ ڌڪينديون آهن. ممڪن آهي تہ جمهوريت و مهوريت ۽ سياستون ٻياستون ان عظيم جيالاجيڪل تبديليءَ جا انساني رد عمل هجن. پر ياد رکو تہ پاڻيءَ جو مسئلو زندگي ۽ موت جو مسئلو هوندو آهي. ان ڪري جڏهن جڏهن بہ تاريخ ۾ پاڻيءَ جو مسئلو پيدا ٿيو آهي، حڪومتون تہ ڇا رياستن جا نقشا بہ تبديل ٿي ويا آهن، آئون ڪنھن بہ غلط فهميءَ ۾ ڪو نہ آهيان، آئون تاريخ جي ورقن مان ڳالهايان ٿو. اعتبار نٿو اچيو تہ سنڌ جي تاريخ (بلڪه دنيا جي تاريخ) کولي پڙهو! توهان ڏسندا تہ جڏهن جڏهن بہ پاڻي جو مسئلو پيدا ٿيو آهي، هڪ وڏي لڏ پلاڻ، ڏڪر، گهرو ويڙھہ ۽ سياسي نقشي ۾ تبديلي آئي آهي.