سما دور ۾ ڪاشي

سما دور ۾ ڪاشي

ڄام نظام الدين جي مقبري جي ڏکڻ اولهه طرف هڪ چؤديواري سرن جي ٺهيل آهي پر ان ۾ بنياد وارا بار پٿر جا آهن. ان جي ڊيگهه 43 فٽ ۽ ويڪر 30 فٽ آهي. ڪوٽ جي پنهنجي اوچائي 5 فٽ کن آهي. اڏاوت جيئن مٿي تئين سوڙهي ٿيندي وڃي ٿي، اندر ٻاهر گچ پلستر ٿيل آهي. ڏکڻ اوڀر طرف ديوار جي ڪناريءَ سان واڱڻائي چٽ تي نيري ڪاشيءَ جون سرون ڪنهن سيکڙاٽ ڪاريگر جون هنيل ٿيون لڳن. ڏکڻ اوڀر واريءَ ڪنڊن جي ٻاهرئين پاسي کان اهڙيون نَـوَ عدد سرون ڪرڻ کان بچي ويون آهن. ڏکڻ واري ڀت جي اندرئين پاسي مٿئين ڪنار تي گهاٽي نيري ڪاشيءَ جي سرن جا نشان به مليا آهن. ڪاشيءَ جون اهي سرون ڏنگيون ڦڏيون آهن، شايد اها به ڪنهن سيکڙاٽ ڪاريگر جي پهرين ڪوشش هجي! هن چؤديواريءَ کي ٽي لنگهه آهن. هڪ اتر، ٻيو اوڀر ۽ ٽيون ڏکڻ کان آهي. اولهه پاسي شايد محراب هئي. ڪوٽ جي اندرئين پاسي ڪافي قبرون آهن، انهن مان ڪجهه ڪرنگهي واريون ته ڪي سڌيون گهاڙيون آهن. ڪرنگهي واريون لسيون ۽ ساديون آهن پر سڌيون قبرون نه رڳو ڏاڪيدار پر ٽُڪيل به آهن. ٻن قبرن جي مرمت چيروليءَ سان ٿيل آهي. هڪ اهڙي هڪ قبرجي گهوڙِيءَ تي ڇَٽ رکيل آهي ۽ قبر کي ٻه ٽي طبق آهن. سڀ کان مٿئين پٿر (گهوڙيءَ) کي ننڍڙن همچورس خانن ۾ ورهايو ويو آهي جن ۾ اُڀي چوڪڙي ۽ ٻين قسمن جي اُڪر ٿيل آهي. قبر جي ٻئي طبق تي عربي لکت آهي. ان شخصيت جي سڃاڻپ نه ٿي سگهي آهي.