ديوان شرفا خان جو مقبرو

ديوان شرفا خان جو مقبرو:

ديوان شرفا خان جو پڪسِرو قبائون مقبرو عيسيٰ خان ترخان II جي اتر اولهه ڪنڊ کان آهي. وچ مان گاڏين جو رستو لنگهي ٿو. هي مقبرو چؤديواريءَ جي اندر آهي، هاڻوڪي چؤديواري گهڻي اوچي نه آهي، اصل ديوار سواءِ اولهه واري ديوار جي، باقي ڊهي چڪي آهي. چؤديواريءَ کي ڏکڻ کان ننڍڙو ونگدار در ڏنل آهي. رواج موجب چؤديواريءَ ۾ اولهه پاسي مسجد ٺهيل آهي. مسجد جو محرابي حصو ۽ ديوار سفيد، هلڪي ۽ نيري ڪاشيءَ سان سينگاريل آهي . مسجد جي آڏو سرن سان مضبوط فرش بندي ٿيل آهي.

هيءَ مقبرو 1638ع (1048هه) جو آهي. مقبرو چؤديواريءَ جي مرڪز ۾ هڪ هيٺاهين پيلٽفارم تي ٺهيل آهي. مقبرو چوڪور آهي پر ان جون ڪنڊون بُرج نما گولائيءَ تي آهن ۽ هر برج تي مٿي چڙهڻ لاءِ ڏاڪڻ آهي. مٿان اُڀي کنيل ڍيڍيءَ تي مخروطي گولائي دار گنبذ آهي. مقبري جي آرائش نيري رنگ جي ڪاشي ۽ سِرن سان ٿيل آهي. گنبذ اندرئين پاسي کان ونگدار خانن ۾ اٿاريو ويو آهي ۽ پوءِ گنبذ جي ڇت توڙي ونگدار خانا نيري ڪاشي ۽ سروٽي رنگ ۾ انگڙ وِنگڙ (zigzag) ڊزائن تي سينگاريل آهن.

مقبري ۾ داخل ٿيڻ جا چار دروازا آهن، جن مٿان وڏي ونگ رکيل آهي. فقط ڏاکڻي ونگ کي پٿر جو چوڪاٺو آهي، جنهن مٿان آيتون لکيل آهن. چوڪور عمارت جي اندرين ڪنڊن تي محرابي بندوبست کي اٺاس ۾ بدلايو ويو آهي، جنهن تي گنبذ رکيل آهي.

ٻاهرين ۽ ظاهري ڏيک ۾ شرفا خان جو مقبرو مرزا جاني بيگ جي مقبري کان بلڪل مختلف آهي پر حقيقت ۾ ان جو اندريون نقشو لڳ ڀڳ ساڳيو آهي. ساڳئي نقشي وارو ٽيون مقبرو سلطان ابراهيم جو آهي جيڪو مرزا باقي بيگ جي ڏينهن ۾ (1572_1584ع) ۾ ٺهي تيار ٿيو هو.