2020-11-06
داخلا نمبر 1145
عنوان خاص مهمان جي آمد
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 10354
داخلا جو حوالو:
هن داخلا جون تصويرون نه مليون
خاص مهمان جي آمد
جمعي جي ڏينهن تي جڏهن ڪراچيءَ واسي موڪل جو ڏهاڙو ملهائيندي گهرن ۾ ٿڪ ڀڃي رهيا هئا يا وري ڪلفٽن جي ڪنڌي تي هوا کائي ”لطف اندوز“ ٿي رهيا هئا، تڏهن ڪراچي هوائي اڏي تي سنگاپور کان هڪ ”خاص مهمان“ لٿو. هو ٻڌائي رهيو آهي ته هو ”ذاتي ڪم“ سانگي آيو آهي پر هن جا ذاتي ڪم هميشه ملڪ جي معاشي ۽ سياسي حالتن تي اثر وجهندا. هو اڄ کان ٻه سال اڳ به آيو هو ۽ پنهنجي ”ذاتي ڪم“ سان نگران وزيراعظم طور ڪرسي تي به ويٺو هو. هن چونڊن واري رات اليڪشن ڪميشن جي آفيس ۾ اخباري عيوضن سان ڳالهائيندي پنجابي ۾ چيو هو ته هو ”ميڊ ان پنجاب“ آهي.
هو اهڙي موقعي تي پاڪستان جو 10 ڏينهن جو دورو ڪري رهيو آهي، جڏهن ملڪ م افواهه هئا ته ڪو عالمي بئنڪ کان اچي رهيو آهي. عالمي بئنڪ کان ته روز ماڻهو ايندا رهندا آهن پر هن خاص مهمان جي ان ڪري به اهميت رهي آهي ته هو هاڻ پاڪستان جي حڪمران طبقي جو حصو آهي. هو اقتدار ۾ ظاهري طور شامل نه آهي. پر ماڻهو ايئن چون ٿا: هو ته ”اصل ۽ وڏن حڪمرانن“ جو خاص ماڻهو آهي. حاڪم طبقن جا ماڻهو ڪڏهن به رٽائر نه ٿيندا آهن ۽ سدائين ”آن ڊيوٽي“ هوندا آهن. هنن جي ڊيوٽيءَ جو انداز ئي نرالو ٿيندو آهي. هنن جو پگهار هميشه ”کڙو“ هوندو آهي. خاص مهمان جي اچڻ کان ڪجهه ڏينهن اڳ ۾ جيڪي زبردست افواهه هئا، انهن جي جواب ۾ وزيراعظم کي چوڻو پيو ته ”ڪو به عالمي بئنڪ کان ڪو نه اچي رهيو آهي. ڪو به ادارو ساڻس بي وفائي نه ڪري رهيو آهي.“ ان بيان کي 24 ڪلاڪ به نه گذريا آهن ته ”خاص مهمان“ اچي ويو آهي. هن جي خواهش آهي ته صدر، وزيراعظم ۽ مخالف ڌر جي اڳواڻن سان ملندو. هن پنهنجي لاءِ پهرين منزل ڪراچي چونڊي آهي. اسان جو مهربان مهمان آهي ئي اهڙو جو هو جڏهن به ايندو آهي، پاڻ سان گڏ افواهه کڻي ايندو آهي ۽ وڃڻ کانپوءِ حڪومت جون معاشي پاليسيون ويتر سخت ٿي وينديون آهن. هاڻ هن جي بريف ڪيس ۾ ڇاهي؟ جڏهن اها ڳالهه کلندي تڏهن ئي حقيقي طور خبر پوندي پر، اهو ضروري به ناهي ته جيڪا ڳالهه سندس زبان تي هجي اها ”اصل ڳالهه“ هجي! پاڪستان جي ماڻهن کي گهڻو دير سان خبر پوندي آهي ته سندن ترا ڪير، ڪڏهن ۽ ڪيئن ڪڍي ويو!