0000-00-00
داخلا نمبر 1754
عنوان بي دردن جون بادشاهيون
شاخ سنڌ ڪيس
پڙهيو ويو 10687
داخلا جو حوالو:
هن داخلا جون تصويرون نه مليون
دهليءَ تائين سڀ ورق مون کي حيران ڪن ٿا ۽ منھنجون سموريون غلط فهميون ختم ٿي وڃن ٿيون. رضا تي راضي رهڻ هڪ ڳالھہ آهي. ايران، بغداد ۽ دهليءَ جي چائنٺ تي پٽڪو رکي پنڻ ٻي ڳالھہ آهي. اڄڪلھہ اسلام آباد ۽ لنڊن کي بغداد ۽ دهلي جي جاءِ تي رکي ڏسڻ گهرجي.
صوفي حضرات جو خيال آهي تہ دنيا ۾ هڪ ظاهري حڪومت هوندي آهي جيڪا ملڪ جا ظاهري حڪمران هلائيندا آهن. ٻي (۽ اصلي) حڪومت روحاني بزرگن (حياتي توڻي مماتي) هٿان قدرت پاڻ هلائيندي آهي. پر پاڪستان ۾ ڪو عجيب مرڪب راڄ آهي. هڪ پير پيرڳوٺ ۾، ٻيو پير لنڊن ۾ گوشه نشين ۽ انھن ٻنہي تي ڇپر ڇانءَ ”پنڊي والا بابا.“
سچ پچ تہ پنڊي والا بابا ڏاڍو طاقتور آهي. هن جون هڪ هزار اکيون ۽ چار پنج لک ٻانہون آهن. اک ڇنڀ ۾ دنيا جا ڏھہ چڪر ڪاٽي سگهي ٿو. ڪاري کي اڇو ۽ اڇي کي ڪارو ڪري سگهي ٿو. هن جي زبان مان اڃا گفتو نڪري ئي مس ٿو تہ اهو حقيقت ٿي پوي ٿو. ڏسو نہ! بابا صاحب ڪراچي ۾ بم ڌماڪن تي فقط ايترو چيو تہ، ”انھن واقعن جو سختيءَ سان نوٽيس ورتو ويو آهي ۽ جلد ئي ڪو اهم قدم کنيو ويندو!“ توهان ڏٺو تہ قدم کڄي ويو، شطرنج جي ظاهري بساط تان هڪ وڏو وزير غائب ۽ ٻيو مهرو حاضر ٿي ويو. بي درد بادشاهن جي حڪومت جو هي انوکو نظام سچ پچ تمام انوکو آهي.