0000-00-00
داخلا نمبر 1691
عنوان اميرخان جي مسجد
شاخ ڪينجهر ڪوهستان
پڙهيو ويو 6530
داخلا جو حوالو:
هن داخلا جون تصويرون نه مليون
اميرخان جي مسجد
هيءَ مسجد ڀائي خان محلي ۾ آهي جنهن لاءِ مير علي شير قانع جو چوڻ آهي ته اها نواب امير محمد خان جوڙائي هئي. مسجد تي موجود هڪ لکت مطابق هيءَ مسجد 1039هه ( 1629ع) ۾ ٺهي تيار ٿي. اها هڪ قبي مسجد آهي. ٻاهرين ماپ 23.6 فٽ ۽ اندرين ماپ لڳ ڀڳ 16فٽ اٿس. اها شڪل ۾ چوڪنڊي آهي. دروازو اوڀر کان اٿس. هيءَ سِرن جي اڏاوت آهي جنهن ۾ ڪاشي به استعمال ٿي آهي. ٻه عربي تحريرون شايد اڃا به بچيل هجن! عمارت کي ڪنهن پوئين دور ۾ مرمت دوران اندرين پاسي کان ڀراءُ ڪري مٿي ڪيو ويو هو، اهو پتو تڏهن پيو جڏهن پويون ڀراءُ ٿورو هٽايو ويو. ڀراءُ هٽيو ته هيٺان ديوار تي آرائش ظاهر ٿي پئي، جنهن تي گل، ٻُوٽا، ميوا ۽ گلدستا وغيره چٽيل هئا. اهي نمونا دهلي ۽ آگري جي طرز جا آهن. ڊاڪٽر داني هن مسجد کي مغل طرز جي يادگار ۽ ٺٽي ۾ پنهنجي نوعيت جي پهرين عمارت سمجهي ٿو.