سلطان ابراهيم خان جو مقبرو

سلطان ابراهيم خان جو مقبرو:

سلطان ابراهيم خان عيسيٰ خان ترخان I جو پُٽ (مرزا باقي بيگ ترخان ۽ جان بابا جو ڀاءُ) هو. هن جا ٻيا تفصيل گم آهن. هي مقبرو نواب خليل خان مهردار جي نالي سان منسوب هو جيڪو مرزا باقي بيگ جي دور ۾ امير هو. ان مقبري ۾ خليل خان دفن نه ٿيو. سلطان ابراهيم جي وفات 1559ع (966هه) ۾ ٿي هئي، ۽ هي مقبرو مرزا باقيءَ جي ڏينهن ۾ ئي تيار ٿي چڪو هو. هي مقبرو نقشي ۾ مرزا جاني بيگ جي مقبري جهڙو ئي آهي. عمارت جي صورت به اَٺ ڪنڊي آهي، جنهن ۾ اتر اولهه ڪنڊ کان مٿي چڙهڻ جي ڏاڪڻ آهي. مقبرو چؤديواريءَ سان آهي، جنهن جو دروازو اوڀر کان رکيو ويو آهي. ابراهيم خان جو مقبرو لڳ ڀڳ شرفا خان جي مقبري جهڙو آهي، ٻاهران به، قبو به.

مقبرو سِرن جو اَٺ محرابو، خوبصورت گنبذ سان ۽ ڪاشي جي ڪم سان ٺهيل آهي. هي مقبرو ترخانن جي عام طرز کان هٽيل آهي. ترخانن جا هڪڙا قبرستان احاطن ۾ (رانئڪون) آهن جيئن: عيسيٰ خان اول، باقي ترخان، محمد صالح ۽ سليمان جا آهن، جن جي چوڌاري اوچي ديوار آهي ۽ اندر کليل ٿلهن تي قبرون آهن. ٻيو نمونو اَٺ ٿنڀي ڇٽيءَ وارو آهي، جيئن مرزا بديع الزمان جو آهي. ٽيون نمونو گنبذ سان آهي جيئن عيسيٰ ثاني، مرزا جاني ۽ مرزا جان بابا جا مقبرا آهن. پر، انهن جا گنبذ مقامي رنگ کان متاثر ۽ مغليه گنبذ کان سراسر مختلف آهن.

ترخاني قبرستانن ۽ سمن سلطانن جي اڏاوتن ۾ فرق پنهنجي جاءِ تي پر انهن ۾ مقامي ۽ گجراتي طرز جي ميلاپ جو تسلسل موجود آهي، مثال طور دريا خان واري رانئڪ، ڄام نظام الدين جو مقبرو ۽ ساڳي دور جون اَٺ ٿنڀيون ڇٽيون، محرابن ۾ پاوا ۽ ٻي چِٽسالي وغيره. ان هوندي به ترخاني قبرن ۽ مقبرن جون ڪي وصفون بلڪل جدا آهن، مثال طور قبرن تي رکيل تعويذ، ونگدار هُرين جا سلسلا، اٺ پاسائين اڏاوت، ڪاشيءَ جو ڪم وغيره.